Plaghar Factory blast: मेटल-अॅसिड एकत्र करताना भयंकर स्फोट, पालघर हादरलं, एकाचा मृत्यू, 5 गंभीर जखमी

जिल्हा आपत्ती व्यवस्थापन कक्षाचे प्रमुख विवेकानंद कदम यांनी सांगितले की, घटनेच्या वेळी पाच कामगार फॅक्टरीत मेटल आणि ॲसिड मिसळण्याचे काम करत होते. ही प्रक्रिया अत्यंत संवेदनशील आणि धोकादायक असल्याने यामुळेच स्फोट झाल्याचा प्राथमिक अंदाज आहे. स्फोटाचा आवाज मोठा असल्याने परिसरात भीतीचे वातावरण निर्माण झाले होते.

या स्फोटात शिरोली येथील रहिवासी दीपक अंधारे (३८) यांचा जागीच मृत्यू झाला. सुरेश कोम (५५) आणि दिनेश गडग (४०) हे गंभीर भाजले असून त्यांची प्रकृती चिंताजनक आहे, तर लक्ष्मण मंडल (६०) आणि संतोष तारे (५१) यांना किरकोळ दुखापत झाली आहे. जखमींना तातडीने उपचारासाठी रुग्णालयात दाखल करण्यात आले आहे.

घटनेची माहिती मिळताच अग्निशमन दल आणि स्थानिक पोलीस घटनास्थळी दाखल झाले. त्यांनी परिस्थिती नियंत्रणात आणली. या प्रकरणाची पुढील चौकशी सुरू असून, औद्योगिक सुरक्षा आणि आरोग्य संचालनालयाच्या अधिकाऱ्यांचा अहवाल आल्यानंतर गुन्हा दाखल करण्यात येईल, अशी माहिती पोलिसांनी दिली आहे.