फलटण डॉक्टर प्रकरणात आतापर्यंतचा सर्वात मोठा दावा, हातावरील एका शब्दाने केस फिरणार? अंधारेंकडून बिद्रे केसचा दाखला

मुंबई : फलटणच्या डॉक्टर युवतीच्या आत्महत्या प्रकरणाची चौकशी सुरू आहे मात्र पोलीस काहीतरी लपवत आहेत, असा आम्हाला संशय आहे. तसेच युवतीच्या हातावरील आणि तिने लिहिलेल्या तक्रार पत्रातील हस्ताक्षर अजिबातच जुळत नसल्याचे सांगत हातावरील निरीक्षक हा शब्द आणि तक्रार अर्जातील तोच शब्द यामध्ये तफावत असल्याचा दावा सुषमा अंधारे यांनी केला. अधोरेखित करण्यासारखी बाब म्हणजे देशातील बहुचर्चित पोलीस अधिकारी अश्विनी बिद्रे हत्याकांड प्रकरणात Y आणि U अशा दोन शब्दांनी प्रकरणाचे गूढ उलगडले होते. आता फलटण डॉक्टर युवतीच्या आत्महत्या प्रकरणाचा गुंता निरीक्षक शब्द सोडविणार का? याकडे अंधारे यांनी लक्ष वेधले. हस्ताक्षर आणि शब्दातील फरक पाहता डॉक्टर युवतीची हत्या की आत्महत्या ही गोष्ट अधिक किचकट झाली आहे, असेही अंधारे म्हणाल्या.