गोविंद बर्गे मृत्यू प्रकरणाला धक्कादायक वळण, पिस्तुलीबद्दल पोलिसांनी कोर्टात दिली मोठी माहिती

सोलापूर: कला केंद्रातील नर्तिकच्या प्रेमात पडून पैसा उधळला, सोन्यानं मढवलं आणि जमिनी सुद्धा नावावर केली. पण, तिच्या प्रेमात अडकलेल्या बीडमधील गेवराई येथील लुखामसलाचे माजी उपसरपंच गोविंद बर्गे यांनी पूजाच्या धमक्यांना घाबरून डोक्यात गोळी झाडून आत्महत्या केली. पण, या प्रकरणाला आता धक्कादायक वळण मिळालं आहे. ज्या पिस्तुलीतून गोविंद बर्गेंनी आत्महत्या केली, ती पिस्तुल बर्गेंची नसल्याची माहिती पोलिसांनी कोर्टात दिली आहे. त्यामुळे ही पिस्तुल नेमकी कुणाची होती, हा प्रश्न आता उपस्थितीत झाला आहे.

9 सप्टेंबर २०२५ रोजी  गोविंद बर्गे यांनी वैराग इथं येऊन पूजा गायकवाडच्या घरासमोर एका कारमध्ये डोक्यात गोळी झाडून आत्महत्या केली होती. या प्रकरणी पारगाव येथील कला केंद्रातील नर्तिक पूजा गायकवाडला पोलिसांनी अटक केली आहे. कोठडी संपल्यानंतर पूजाला आज शनिवारी बार्शी न्यायालयात हजर करण्यात आलं होतं. यावेळी पोलिसांनी गोविंद बर्गे यांनी आत्महत्या केली त्यावेळी वापरलेल्या पिस्तुलीबद्दल नवीन दावा केला आहे.

ज्या दिवशी बर्गेंनी आत्महत्या केली, त्या दिवशी गोविंद बर्गे आणि पूजा गायकवाड यांच्यामध्ये फोनवर काय संवाद झाला हे तपासायचं आहे. यासाठी  पूजा गायकवाडच्या फोनचा सीडीआर काढणे गरजेचं आहे आणि त्याचं विश्लेषण करणं आहे.  गोविंद बर्गे यांनी गोळी झाडून ज्या पिस्तुलीनं आत्महत्या केली, ते पिस्तूल गोविंद बर्गेंचं नसल्याचं आलं समोर आहे.  गोविंद बर्गे यांच्या नावावर कोणत्याही प्रकारचे पिस्तूल नसल्याचं तपासात उघड झालं आहे. सदर पिस्तूल हे बर्गे यांनी दुसऱ्याकडून खरेदी केलं असावं असा दावा पोलिसांनी केला आहे. या पिस्तुलीचा त्याचा पत्रव्यवहार संबंधित विभागाकडे सुरू आहे.