Pune News : पुण्यातल्या प्रकरणावरून राजकारण तापलं, दिल्लीत अस्वस्थतेची झळ, हायकमांड नाराज

पुण्यातील जैन बोर्डिंगची जमीन खासगी बिल्डरला दिल्या प्रकरणी केंद्रीय राज्यमंत्री मुरलीधर मोहोळ यांच्यावर आरोपांचे बाण सोडण्यात आले. मॉडेल कॉलनी येथील “सेठ हिराचंद नेमचंद जैन दिगंबर बोर्डिंग” या ट्रस्टची जमीन व त्या परिसरातील मंदिर संबंधी जागा विक्री प्रकरणातील विकासकासोबत मुरलीधर मोहोळ यांचे संबंध असल्याचा आरोप करण्यात आला. या विकासक कंपनीत मोहोळ हे भागीदार आहेत, त्यातूनच जैन बोर्डिंगची जमीन हडपल्याचा आरोप करण्यात आला. पुण्यात या व्यवहाराविरोधात जैन समुदायाने मोठं आंदोलन सुरू केले होते. केंद्रीय राज्यमंत्री मुरलीधर मोहोळ यांनी हे आरोप फेटाळून लावले. या प्रकरणाशी काहीही संबंध नसल्याचेही त्यांनी स्पष्ट केले.

पहिल्यांदाच खासदार झालेले मुरलीधर मोहोळ यांना केंद्रात मंत्रि‍पदाची संधी मिळाली. सहकार खात्याचे राज्यमंत्री पद त्यांच्याकडे आहे. तर, या खात्याचे कॅबिनेटपद अमित शाह यांच्याकडे आहे. त्यामुळेच मोहोळ यांच्यावर भ्रष्टाचाराचे आरोप झाल्याने दिल्ली भाजपात अस्वस्थता निर्माण झाल्याची माहिती सूत्रांनी दिली आहे.

पुण्यातील जमीन प्रकरणावरून भाजप विरुद्ध शिवसेना असा कलगीतुरा रंगल्याचे दिसून आले आहे. मुरलीधर मोहोळ आणि रविंद्र धंगेकर हे या प्रकरणातील आरोप-प्रत्यारोपाचे चेहरे असले तरी दोन्ही पक्षांमध्ये कुरघोडी सुरू असल्याचे म्हटले जात आहे. धंगेकर यांनी आपण पुणेकरांसाठी लढू असे म्हटले. त्यानंतरही शिवसेना शिंदे गटाकडून धंगेकर यांच्यावर विश्वास दाखवण्यात आला. त्यामुळे शिंदे यांचे धंगेकर यांना पाठबळ आहे का, याची चर्चा आहे.

दरम्यान, आज मुंबई दौऱ्यावर आलेले केंद्रीय गृहमंत्री आणि भाजप नेते अमित शाह आज महायुतीच्या नेत्यांसोबत बैठक घेण्याची शक्यता आहे. आगामी स्थानिक स्वराज्य संस्थांच्या निवडणुकीआधी महायुतीमध्ये वाद पेटू नये यासाठी अमित शाह मध्यस्थी करतील अशी चर्चा सुरू आहे.