लक्ष्मी फक्त घरात नाही तर शेतातही वसते! पुरंदरच्या आडाच्यावाडीत अनोख्या पद्धतीने लक्ष्मीपूजन

कृषीप्रधान संस्कृतीत शेतातील ‘काळ्या आई’चं महत्व मोठं आहे. येथे शेतकऱ्यांनी आपल्याला वर्षभर उत्पन्न देणाऱ्या अंजीर आणि अन्य फळझाडांची पूजा करून निसर्गाबद्दल कृतज्ञता व्यक्त केली. महिलांनी सुवासिनी वेशात झाडांना ओवाळून त्यांचं पूजन केलं. अनेक कुटुंबांनी अंजिराच्या बागांमध्ये दिव्यांची सजावट करत फटाक्यांच्या आतषबाजीत लक्ष्मीपूजन पार पाडलं.

पुरंदर तालुक्यातील आडाचीवाडीसह वाल्हे येथील बापसाईवस्ती आणि हनुमानवस्ती परिसरामध्ये वर्षभर शेतामधुन विविध पिकांबरोबरच अंजिराचे मोठ्या प्रामाणावर उत्पन्न घेतले जाते. त्यामुळे येथे फळबागांना लक्ष्मीचे रूप मानुन अगोदर शेतात पूजा होते. दरवर्षी लक्ष्मीपुजनाच्या दिवशी सायंकाळी शेतातील काळ्या आईला वंदन करुन परिसरातील प्रत्येक फळबाग उत्पादक शेतकऱ्यांसह सुवासिनी झाडांची विधीवत पूजा होते आणि नंतर घरातील लक्ष्मीपूजन साजरं केलं जातं. ही परंपरा आजही तितक्याच श्रद्धेने पाळली जाते.

अंजिराच्या झाडांच्या पुजनानंतरच येथील शेतकरी आपापल्या घरातील लक्ष्मीपुजन साजरे करण्याची परंपरा आजही कायम जपत आहेत. आजचा लक्ष्मीपुजनाचा मुहर्त साधत अनेक कुटूंबियांनी या परंपरेचे पालन केले. दरम्यान सायंकाळी येथील परिसरातील अंजिरासह फळबागांमधुन दिव्यांच्या लखलखाटासह फटाक्यांच्या आतषबाजीने जणू लक्ष्मी अवतरल्याचे दिसून येत होते.