अजितदादा गेले, काही तासांतच त्या ७५ फायलींवर सह्या, अधिकाऱ्यांचा प्रताप, रोहित पवार संतापले

मुंबई : राज्याचे दिवंगत उपमुख्यमंत्री अजित पवार यांच्या निधनानंतरच्या काही तासांतच अल्पसंख्याक विभागाच्या ७५ विचाराधीन असलेल्या फायलींवर अधिकाऱ्यांनी सह्या केल्याचे प्रकरण समोर आले आहे. ज्या फायलींवर मंत्री म्हणून अजित पवार आणि माणिकराव कोकाटे विचार करीत होते, त्याच फायलींवर कोणताही मागचा पुढचा विचार न करता मंत्रालयातील वरिष्ठ अधिकाऱ्यांनी सह्या केल्याने आश्चर्य व्यक्त केले जात आहे. गेंड्याच्या कातडीच्या अधिकाऱ्यांना संवेदना नावाची गोष्ट उरली आहे की नाही? असा सवाल जनसामान्यांमधून व्यक्त होत आहे. राष्ट्रवादीचे आमदार रोहित पवार यांनीही अधिकाऱ्यांच्या प्रतापावर संताप व्यक्त केला आहे.