शाळेऐवजी 9 वर्षांच्या मुलीला लावलं भलत्याच कामाला, कराडमध्ये बापलेकीचे 6 महिन्यात 6 कांड, पोलीस चक्रावले!

यशवंत काटवटे असे या आरोपी बापाचे नाव आहे. आरोपीने आपल्या मुलीला शाळेत पाठवण्याऐवजी रेकी करायला पाठवत असे. मुलीने रेकी केल्यानंतर आरोपी काटवटे तिथे जाऊन घरफोडी करत असे. बापलेकीचा हा कांड आता कराड पोलिसांनी उघडकीस आणला आहे.

मिळालेल्या माहितीनुसार, फेब्रुवारी ते जुलै महिन्यादरम्यान कराड शहर परिसरातील मलकापूर, कोयना वसाहत आणि कार्वेनाका येथे अनेक घरफोडीच्या घटना घडल्या. मात्र, आरोपींचा शोध लागत नव्हता. याप्रकरणी कराड शहर पोलीस निरीक्षक अशोक भापकर आणि त्यांच्या पथकाने तपास सुरू केला. पोलिसांनी सीसीटीव्ही फुटेज, तांत्रिक विश्लेषण आणि गोपनीय माहितीच्या आधारे तपास केला असता, एका अल्पवयीन मुलगी आणि तिच्या बापावर संशय बळावला.

पोलिसांनी या बाप-लेकीला ताब्यात घेतले असता, चौकशीदरम्यान त्यांनी सहा घरफोड्या केल्याची कबुली दिली. पोलिसांनी दिलेल्या माहितीनुसार, यशवंत काटवटे हा आपल्या ९ वर्षांच्या मुलीला घरफोडी करायच्या ठिकाणाची रेकी करण्यासाठी वापरत होता. मुलगी दिवसभर घरांची माहिती गोळा करायची आणि त्यानंतर तिचा बाप रात्रीच्या वेळी घरात चोरी करत होता. या दोघांनी मिळून सहा ठिकाणी घरफोड्या केल्याचे समोर आले आहे.

या कारवाईत पोलिसांनी आरोपीकडून एकूण २७.१ तोळे सोन्याचे दागिने जप्त केले आहेत. या घटनेमुळे परिसरात एकच खळबळ उडाली आहे. पोलिसांनी या प्रकरणाचा अधिक तपास सुरू केला असून, आरोपीला लवकरच न्यायालयात हजर केले जाईल.