भाड्याच्या घरात सुरू केला व्यवसाय, 30 वर्षांची मेहनत अन् आज दिवसाला दीड हजारांची कमाई, साताऱ्याच्या महिलेची गोष्ट!

सातारा : आज महिला या पुरुषाच्या खांद्याला खांदा देऊन काम करत आहेत. असं कुठलंही क्षेत्र नाही की ज्यामध्ये महिला आपलांनी आपलं कर्तृत्त्व सिद्ध केलं नाहीये. नोकरी, समाजसेवा किंवा उद्योगधंद्यातही महिला आज यशस्वीरित्या समाजाला प्रेरणा देत आहेत. आज अशाच एका महिलेची कहाणी आपण जाणून घेणार आहोत.

शोभा विलास पेटकर असे या महिलेचे नाव आहे. लातूरमधून ही महिला आपल्या पतीसोबत मागील 40 वर्षांपूर्वी साताऱ्याला आली आणि तेथे त्या आजही भाड्याच्या घरात राहत आहेत. अतिशय बिकट परिस्थितीत आपला संसार चालवत होत्या. मुला-मुलींचे शिक्षण त्याचबरोबर संसाराचा गाडा पती-पत्नी मिळून ओढत होते.

पतीच्या कमाईवरून संसार चालत नसल्याने भाड्याच्या घरात व्यवसाय सुरू करण्याचा निश्चय शोभा विलास पेटकर यांनी केला. यानंतर भाड्याच्या घरातूनच भडंग उपवासाचे पदार्थ बनवण्याचा व्यवसाय सुरू केला. जिद्द, चिकाटी आणि कष्ट करण्याची तयारी असेल तर अशक्य गोष्ट शक्य करता येते, याचे सर्वोत्तम उदाहरण त्यांनी सिद्ध करुन दाखवले आहे.

भडंग आणि इतर पदार्थ तयार करून त्याची विक्री करून त्यांनी आपल्या मुलांना उच्चशिक्षण दिले. त्यांची मुलगी इंजीनिअर झाली आहे. तर मुलगा उच्चशिक्षित आहे आणि एका चांगल्या कंपनीत कामालाही आहे. जिद्द आणि चिकाटी असेल तर व्यवसाय सुरू करण्यासाठी प्रबळ असे भांडवल नसले तरी छोट्या भांडवलातूनही व्यवसाय सुरू करता येतो आणि त्यातून महिन्याला हजारो रुपये कमवता येतात, हे या यशस्वी उद्योजिका शोभा विलास पेठकर यांनी दाखवून दिले आहे.