ऑनलाईन वीज बिल भरा अन् आकर्षक बक्षिसे मिळवा, महावितरणची लकी डिजिटल ग्राहक योजना काय?

सिंधुदुर्ग : महावितरणने ऑनलाईन बीज बिल भरणाऱ्या ग्राहकांचा टक्का वाढविण्याच्या हेतूने लकी डिजिटल ग्राहक' ही अभिनव योजना सुरू केली आहे. या योजनेसाठी ऑनलाईन वीज बिल भरणा करणारे सर्व लघुदाब वीज ग्राहक पात्र आहेत. 1 जानेवारी ते 31 मे या कालावधीत सलग तीन वा तीन पेक्षा अधिक वीज बिले भरून योजनेच्या लाभाची संधी ग्राहकांना उपलब्ध करण्यात आली आहे, अशी माहिती महावितरण प्रशासनाकडून देण्यात आली.

महावितरणकडून देण्यात आलेल्या प्रसिद्धी पत्रकात म्हटले आहे, ही योजना महावितरणच्या अशा लघुदाब चालू (LT Live) वीजग्राहकांसाठी लागू असेल. ज्यांनी 1 एप्रिल 2024 पूर्वी मागील एक वर्ष म्हणजे 1 एप्रिल 2023 ते 31 मार्च 2024 या कालावधीत एकदाही बीज देयकावा भरणा केलेला नाही किंवा ऑनलाईन वीज देयक भरणा पर्याय वापरलेला नाही. अशा ग्राहकांना लकी ड्रा द्वारेस्मार्ट फोन, स्मार्ट वॉच अशी आकर्षक बक्षिसे दिली जाणार आहेत. ग्राहक रांगेत उभे राहण्यापेक्षा वेळ श्रम, पैशाची बचत करत डिजिटल पद्धतीने बिल भरण्यास पसंती देत आहेत. ग्राहकांना डिजिटल पद्धतीने बिल भरण्यास प्रोत्साहन देण्यासाठी ही लकी डिजिटल ग्राहक योजना राबविण्यात येत आहे.