100 बैलगाड्यांचा ताफा अन् पारंपरिक वाद्ये, सोलापुरातील रंगपंचमीला 150 वर्षांची परंपरा, Video

सोलापूर : महाराष्ट्रात रंगपंचमी हा सण मोठ्या उत्साहात साजरा केला जातो. सोलापुरात लोधी समाजाच्या रंगपंचमीच्या उत्सवाला विशेष महत्त्व आहे. 150 वर्षापासून लोधी समाज बांधवांकडून रंगपंचमीचा उत्सव साजरा केला जातो. या उत्सवात फक्त लोधी समाजच नाही तर परिसरात राहणारे राजपूत समाज, तेली समाज, मोची समाज, मुस्लीम समाज इतर सर्व समाज बांधव मिळून अतिशय उत्साहात हा उत्सव दरवर्षी साजरा करतात. यातून एक सामाजिक बांधीलकी लोधी समाजाकडून जपली जाते. परंपरेनुसार होळी दहन पासून रंगपंचमी पर्यंत हा उत्सव चालतो. जवळपास 8 दिवस रंगपंचमी उत्साहाची तयारी लोधी समाज करत असतो.

सोलापूर शहरालगत असणाऱ्या खेड्यांमधून या बैलगाड्या मागवल्या जात असतात. दुपारी दोन वाजता बालाजी मंदिरामध्ये आरती होऊन या रंग गाड्यांची मिरवणूक काढण्यात आली. यावेळी लोधी समाज अध्यक्ष भगतसिंग कल्लावाले श्री बालाजी मंदिर ट्रस्ट अध्यक्ष घनश्याम शिवसिंगवाले, माजी नगरसेवक रवीसिंग कय्यावाले भारतसिंग बडरूवाले आदींसह पदाधिकारी कार्यकर्त्यांच्या हस्ते रंग गाड्यांची पूजा आणि आरती होऊन मिरवणुकीस मोठ्या उत्साहात सुरुवात झाली. याप्रसंगी लोधी समाज अध्यक्ष भगतसिंग कल्लावाले आणि माजी नगरसेवक रविसिंग कय्यावाले, नागनाथ शिवशिंगवाले यांनी रंगपंचमी निमित्ताने निघणाऱ्या रंग गाड्यांच्या मिरवणुकीचा इतिहास स्पष्ट केला.