Solapur : डोळ्याला चटणी लावली अन् सपासप वार! मनसे पदाधिकारी बाळासाहेब सरवदे हत्या प्रकरणात मोठा ट्विस्ट

या गंभीर गुन्ह्याप्रकरणी भाजप उमेदवार शालन शंकर शिंदे यांच्यासह एकूण 15 जणांवर गुन्हा दाखल करण्यात आला आहे. फिर्यादीत दिलेल्या माहितीनुसार, शालन शिंदे यांनी मयत बाळासाहेब यांच्या डोळ्यात चटणी टाकली आणि त्यानंतर इतर आरोपींनी त्यांच्यावर धारदार शस्त्राने सपासप वार करून त्यांचा जीव घेतला, असं फिर्यादीत म्हटलं आहे. त्यामुळे आता पोलीस देखील तातडीने प्रकरणाता छडा लावण्यासाठी प्रयत्न करत आहेत.

या घटनेमागे राजकीय स्पर्धेचे कारण असल्याचे बोलले जात आहे. भाजप उमेदवार शालन शिंदे यांना उमेदवारी मिळाल्यानंतर पक्षातीलच दुसऱ्या इच्छुक उमेदवार रेखा सरवदे यांच्यासोबत त्यांचा तीव्र वाद झाला होता. हा वाद अर्ज मागे घेण्यावरून सुरू झाला होता. या वादानंतर रेखा सरवदे यांनी आपला अर्ज तर मागे घेतला, मात्र हा वाद तिथेच थांबला नाही. त्यानंतर बाळासाहेब सरवदे यांची हत्याचं झाल्याने एकच खळबळ उडाली होती.

या प्रकरणी जेलरोड पोलीस ठाण्यात मयताचे भाऊ बाजीराव पांडुरंग सरवदे यांनी तक्रार दिली आहे. पोलिसांनी या घटनेचे गांभीर्य ओळखून बीएनएस कलम 103, 109, 189 (1), (2) आणि शस्त्र अधिनियमासह एकूण 13 कलमांन्वये गुन्हा नोंदवला आहे. भरदिवसा घडलेल्या या घटनेमुळे राजकीय वर्तुळात मोठी खळबळ उडाली असून पोलीस आता पुढील तपास करत आहेत.

दरम्यान, सोलापूर महानगरपालिकेच्या एकूण 102 जागांसाठी आता 737 उमेदवार निवडणुकीच्या रिंगणात आपले नशीब आजमावणार आहेत. अर्ज मागे घेण्याच्या शेवटच्या दिवशी एकूण 1230 वैध अर्जांपैकी 493 उमेदवारांनी माघार घेतली. यामुळे आता 26 प्रभागांमधील लढतींचे चित्र स्पष्ट झाले असून, आज या सर्व उमेदवारांना त्यांच्या निवडणूक चिन्हांचे अधिकृत वाटप केले जाणार आहे. भारतीय जनता पक्षाने आपली रणनीती अत्यंत सावधपणे राबवली असून पक्षांतर्गत बंडखोरी रोखण्यात त्यांना मोठे यश आले आहे. पक्षाचे अधिकृत उमेदवार आणि बंडखोर यांच्यात समन्वयाचे प्रयत्न यशस्वी झाले. यामध्ये प्रामुख्याने जगदीश पाटील, पांडुरंग दिड्डी, प्रभाकर जामगुंडे, परमेश्वर माळगे, श्रीकांत घाडगे आणि इंदिरा कुडक्याल या बंडखोर नेत्यांची समजूत काढण्यात भाजप नेत्यांना यश आले असून त्यांनी आपले अर्ज मागे घेतले आहेत.