RTO Radar: वेगाशी स्पर्धा कराल तर खिसा रिकामा होणार! आरटीओ करणार 'रडार' सिस्टीमचा वापर

रडार यंत्रणा रेडिओ लहरींचा वापर करून एखादी वस्तू कुठे आहे? तिचा वेग किती आहे? यांचा शोध घेण्याचं काम करते. वाहनांचा वेग मोजण्यासाठी ही यंत्रणा काम करते. रहार लहरींचा वेग प्रकाशाच्या वेगाएवढा असतो. त्यामुळे ताशी 100, 150, 200 किंवा 300 किलोमीटर वेगाने जात असलेली वाहनं देखील रडार सहज पकडतं. रडार यंत्रणेमुळे वाहन चालकाने वाहतूक नियम मोडला की, काही सेकंदात चालकाला ई-चलान मिळणार आहे. वाहतूक पोलिसांच्या रडार गन 300 मीटर ते एक किलोमीटर अंतरापर्यंत वाहनांचा वेग पकडू शकतात. त्यामुळे अर्धा किलोमीटरपर्यंतचं वाहन सहज रडारच्या टप्प्यात येतं.

वाहतुकीचे नियम मोडल्यास, रडार यंत्रणेचे कॅमेरे लगेच वाहनांची नंबर प्ले स्कॅन करतात. तिची आरटीओ डेटाबेसशी पडताळणी होते. त्यानंतर सिस्टीम पुरावा प्रोसेस करते व ई वाहन चालकाच्या मोबाईल किंवा ई-मेलवर चलान पाठवले जाते. अशा प्रकारे एका तासाला सातशे ते आठशे ई चलान तयार होतात.

'इंटरसेप्टर वाहन' हे विशेष पोलीस वाहन असते. महामार्गावर किंवा शहरातील वाहतुकीवर नियंत्रण ठेवण्यासाठी त्याचा वापर केला जातो. यात कॅमेरे, रडारगन, स्पीड डिटेक्टर, ब्रेथ अॅनालायझर, वायरलेस सिस्टीम, अशी आधुनिक उपकरणे बसवलेली असतात. ठाणे जिल्ह्यात रडार यंत्रणेवरील वाहन अजून सुरू करण्यात आलेलं नाही. मात्र, लवकरच त्याचा वापर सुरू होईल, अशी माहिती आरटीओ विभागातील एका अधिकाऱ्याने दिली.