Thane: ठाणे हादरलं! ३५ वर्षे जुन्या इमारतीचा स्लॅब कोसळला; एकाच कुटुंबातील ३ जण जखमी

वागळे इस्टेटमधील शांतीनगर भागात 'नूतन निलम' ही ३५ वर्षे जुनी इमारत आहे. आज सकाळी या इमारतीच्या पाचव्या मजल्यावर राहणाऱ्या गजेंद्र प्रसाद यांच्या घराच्या हॉलचा स्लॅब अचानक कोसळला. हा स्लॅब थेट चौथ्या मजल्यावर राहणाऱ्या यादव यांच्या घरात पडला. यावेळी यादव कुटुंबातील तीन सदस्य घरात असताना ते ढिगाऱ्याखाली अडकून जखमी झाले.

घटनेची माहिती मिळताच ठाणे महापालिकेचे आपत्ती व्यवस्थापन पथक आणि अग्निशमन दलाने घटनास्थळी धाव घेतली. जखमींना तातडीने ढिगाऱ्याखालून बाहेर काढून जवळच्या खासगी रुग्णालयात दाखल करण्यात आले आहे.

इमारत ३५ वर्षे जुनी असून एकूण २६ घरे आहेत. यामध्ये एकूण ९५ व्यक्ती वास्तव्यास आहेत. इमारतीचा स्लॅब कोसळल्यानंतर महापालिकेच्या शाळेत इमारतीमधील सर्व रहिवाशांची राहण्याची सोय करण्यात आली आहे.

इमारतीचा इतर भागही धोकादायक ठरू शकतो, हे लक्षात घेऊन पालिकेने संपूर्ण इमारत सील केली आहे. अचानक घर सोडावे लागल्याने रहिवाशांमध्ये चिंतेचे आणि भीतीचे वातावरण आहे.