129 वर्ष जुन्या गणेशोत्सवास कल्याणमध्ये थाटात सुरूवात, लोकमान्य टिळकांशी आहे जवळचा संबंध

पुण्यात 1893 साली सुरू झालेला गणेशोत्सव बापूसाहेब फडके यांनी पाहिला होता. त्यानंतर त्यांनी कल्याणमध्येही हा उत्सव सुरू करण्याचं ठरवलं. प्रभाकर ओक, लखूनाना फडके यांना त्यांनी याबाबत गळ घातली. चिंतामण वैद्य आणि काही मंडळींनी पुढाकार घेऊन हा उत्सव सुरू केला. त्यावेळी भाऊसाहेब बिवलकर यांच्या सुभेदार वाड्यात भरपूर जागा असल्याने हा उत्सव तेथे साजरा व्हावा असे ठरले.

यावर्षी गीतेवर आधारित देखावा केला आहे. कृष्णाने जेव्हा अर्जुनाला गीता सांगितली तेव्हा कर्माचे महत्त्व सांगितले. तुला युद्ध करावे लागते हे तुझे कर्मच आहे. तेव्हा कृष्णाने अर्जुनाला सांगितलेल्या गोष्टी आजही तंतोतंत लागू पडतात. जेव्हा आपण अब्दुल कलाम , सिंधुताई सकपाळ, सचिन तेंडुलकर, अमिताभ बच्चन, रतन टाटा, लता मंगेशकर, एम एस धोनी , कल्पना चावला यांना बघतो त्यावेळी त्यांच्या कामाने ते मोठे झाले आहेत ते लक्षात येते. त्यामुळे कृष्णाने अर्जुनाला सांगितलेले तत्वज्ञान आजही चपखल बसते.

दहा दिवस असलेल्या या गणपती बाप्पा समोर गायनाचे, मुलाखतीचे वेगवेगळे कार्यक्रम आयोजित केले जातात. रक्तदान शिबिर देखील येथे भरवले जाते अशी माहिती मंडळाचे सभासद प्रशांत खरे यांनी दिली.