Thane News: पावसाचं थैमान! पूलच गेला वाहून, शहापूर-मुरबाड रस्त्यावर वाहनांना प्रवेश बंदी

भातसा नदीवरील पूल वाहून गेल्याचा एसटी बसला फटका बसला आहे. शहापूर बस आगारातून सोमवारी एकही बस सापगाव मार्गे सोडण्यात आली नाही. या आगारातून 25 पेक्षा अधिक बस गावांत जातात, असे आगार प्रमुख मानसी शेळके यांनी सांगितले.

शहापूर - मुरबाड वाहतूक सापगाव मार्गे बंद राहिल्याने तालुक्यातील शेणवा, किन्हवली, डोळखांब आदी महत्त्वाच्या गावांसह शंभराच्या आसपास लहान मोठ्या गावांशी संपर्क होऊ शकत नाही. त्यामुळे शहापूर, आसनगाव, पडघे, भिवंडी, कल्याण, मुंबईत नोकरीसाठी जाणाऱ्या ग्रामीण भागातील नोकरदार, रोजंदारी कामगार, रिक्षा प्रवासी, खासगी वाहतूक करणाऱ्या नागरिकांचे हाल झाले आहेत. पुलाची डागडुजीचे काम सुरू असून येत्या दोन दिवसांत वाहतूक सुरळीत होईल, यासाठी प्रयत्न असल्याचे तहसीलदार परमेश्वर कासुळे यांनी सांगितले.