यंदाच्या 'व्हॅलेंटाईन डे'ला मीट युअर मॅच, मुक्या जीवांवर करा भरभरून प्रेम, Video

फ्रीडम फार्म फाउंडेशनच्या माध्यामातून विविध प्राण्यांना रेस्क्यू करून आणलं जातं. त्यांच्यावर उपचार केले जातात. त्यांचा सांभाळ केला जातो. तसेच या प्राण्यांना सांभाळणारं कोणी चांगलं कुटूंब भेटेल याची व्यवस्थाही केली जाते. एवढचं नाही तर एखाद्या प्राण्याला दत्तक देण्यावेळी त्या कुटूंबाची चौकशी करूनच योग्य तो निर्णय घेतला जातो. अनेक वर्षांपासून ही फांउडेशन प्राणीसेवा करतेय. तसेच वेगवेगळ्या थीममधून मुक्या जीवांनाही आपल्याप्रमाणेच वागवलं पाहिजे, त्यांनाही भावना असतात हे वेळोवेळी दाखवून आणि समजावून सांगितलं आहे. आतापर्यंत जवळपास हजारोंच्या घरात या फाउंडेशननं प्राण्यांचा जीव वाचवला आणि त्यातील काहींना चांगल्या ठिकाणी दत्तकही दिलं आहे.

या फाउंडेशनच्या माध्यमातून रस्त्यावर सोडून दिलेले कुत्रे- मांजर, कोणत्याही अपघातानं जखमी झालेले प्राणी, रेल्वे रुळावर जखमी अवस्थेत सापडलेले प्राणी अशा अनेक प्रसंगांमध्ये सापडलेल्या प्राण्यांना रेस्क्यू केलं जातं. तसेच काहीजण या फाउंडेशनच्या सदस्यांसोबत संपर्क साधून प्राण्यांना आणूनही सोडतात. या प्राण्यांचा सर्व खर्च, त्यांच्या राहण्याची व्यवस्था सगळं काही या फाउंडेशनच्या माध्यमातून केली जाते. दरम्यान एखाद्या प्राण्याला दत्तक देतानाही बरीच काळजी घेतली जाते.

"आम्ही एखाद्या प्राण्याला दत्तक देण्यावेळी त्या कुटूंबाची चौकशी करतो. त्यांच्या घरचं वातावरण प्राण्यांना मानवेल असं आहे का? हे पाहतो. तसेच एखाद्या प्राण्याला घेऊन गेल्यावर दोन आठवड्यांचा वेळ दिला जातो. जेणेकरून आम्हाला हे समजतं की तो प्राणी त्या कुटूंबासोबत राहू शकतो की नाही. मगच त्या प्राण्याला आम्ही कुटूंबाकडे कायमच सोपवतो. तसेच त्या प्राण्याबद्दलची सर्व माहितीही त्या कुटूंबाला देतो. तसेच वेळोवेळी त्यांची चौकशीही करतो." असं फ्रीडम फार्म फाउंडेशनचे अध्यक्ष प्रणव त्रिवेदी यांनी सांगितलं आहे. दरम्यान, अनेकांनी या फाउंडेशनच्या माध्यमातून तेथील प्राण्यांना दत्तकही घेतलं आहे. तसेच या प्राण्यांच्या खर्चासाठी फाउंडेशनला मदत मिळावी अशी अपेक्षाही प्रणव यांनी बोलून दाखवली.