पक्षफुटीपासून शिंदेंवर आसूड पण ठाकरेंच्या आजच्या भाषणात फक्त भाजप आणि फडणवीस टार्गेटवर, कारण...

मुंबई : शिवसेना पक्षफुटीपासून उद्धव ठाकरे हे त्यांच्या प्रत्येक भाषणात एकनाथ शिंदे यांच्यावर सडकून टीका करतात, गद्दार म्हणून हिणवतात, त्यांच्या सहकाऱ्यांवर जोरदार हल्ला चढवतात, मात्र दसरा मेळाव्यातील त्यांचे आजचे भाषण त्याला अपवाद ठरले. भगव्या शालीवरून केलेली टीका सोडता उद्धव ठाकरे यांनी एकनाथ शिंदे यांच्यावर बोलणे टाळले. त्यांच्या भाषणाचा मुख्य रोख हा भारतीय जनता पक्ष, केंद्रातील सरकार आणि मुख्यमंत्री फडणवीस यांच्याकडे होता. भाजपची मातृसंस्था राष्ट्रीय स्वयंसेवक संघालाही त्यांनी सवाल केले. आपल्या शिवसेनेचा कार्यक्रम एकच अंधभक्तांच्या डोळ्यावरील पट्टी काढणे असे म्हणत सरकारच्या चुकीच्या कामाचे आणि कारभाराचे वाभाडे काढा, असेच त्यांनी पदाधिकाऱ्यांना सांगितले.