Uddhav Thackeray : BMC निवडणुकीआधी ठाकरेंना मोठा झटका, नवी मुंबईनंतर भिवंडीत शिंदेंनी पाडलं खिंडार!

विधानसभा निवडणूकीनंतर ठाकरे गटाला घरघर लागली आहे. पराभवाची निराशा आणि आपापसातील मतभेद यामुळे वैतागलेल्या पदाधिकाऱ्यांचा लोंढा शिंदे गटाकडे वळू लागला आहे. अशाच पध्दतीने भिवंडी शहरातील प्रमुख पदाधिकाऱ्यांनी स्थानिक नेतृत्वावर नाराज होत उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला.

भिवंडी शहरातील प्रमुख पदाधिकाऱ्यांमध्ये शहर सचिव महेंद्र कुंभारे, दोन्ही विधानसभा संघटक दिलीप नाईक, उमेश कोंडलेकर, दोन्ही विधानसभा सचिव गोकुळ कदम, दिलिप कोंडलेकर, सर्व उपशहरप्रमुख राकेश मोरे, विरेंद्र पाटील, मनोज पाटील, विभागप्रमुख सोमनाथ भोईर, गंगाधर बलांडे, रमेश पवार, शाखाप्रमुख राहुल मोरे, शंकर बेदरकर, दुर्वेन धुमाळ, विराज मोरे, अभिषेक तिवारी, जतीन मोरे, राहुल झा आणि इतर शिवसैनिकांनी शिंदे गटात जाहीर प्रवेश केला आहे. त्यामुळे भिवंडीत ठाकरे गटाला खिंडार पडले आहे. तर महापालिका निवडणुकीआधी शिंदे गटाची ताकद वाढली आहे.

नवी मुंबईचे माजी नगरसेवक द्वारकानाथ भोईर यांच्यासह काही नगरसेवकांनी गेल्या रविवारी उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला आहे. या पक्षप्रवेशामुळे ठाकरे गटाला मोठा फटका बसला आहे.

नवी मुंबईत अनेक माजी नगरसेवक ठाकरे गटामध्ये होते. यामध्ये माजी नगरसेवक द्वारकानाथ भोईर यांच्यासह काही पदाधिकाऱ्यांचा समावेश होता. द्वारकानाथ भोईर हे नवी मुंबईत ठाकरे गटाचे जिल्हाप्रमुख होते. रविवारी त्यांनी उद्धव ठाकरे यांची साथ सोडत शिंदे गटात प्रवेश केला. द्वारकानाथ भोईर यांच्यासह माजी नगरसेवक दयानंद माने, मधूकर राऊत, मेघाली मधूकर राऊत, उपशहर प्रमुख संजय देसाई यांच्यासह ठाकरे गटाच्या पदाधिकाऱ्यांनी शिंदे गटात प्रवेश केला.

दरम्यान विधानसभा निवडणुकीत उद्धव ठाकरे यांनी 95 जागांवर आपले उमेदवार उभे केले होते. पण त्यांना अवघ्या 20 जागांवर विजय मिळवता आला. ठाकरेंनी ज्या जागा जिंकल्या त्यात बऱ्यापैकी मुंबईचे आमदार आहेत. त्यामुळे आगामी मुंबई महानगर पालिकेत ठाकरेंचं पारडं जड ठरू शकतं, अशा शक्यता आहे. अशात महत्त्वाचे नेते आणि पदाधिकारी त्यांची साथ सोडत असल्याने विधानसभेनंतर मुंबई महापालिका देखील ठाकरेंच्या हातून निसटण्याची शक्यता आहे. त्यामुळे ठाकरे गटासमोरील अडचणींत वाढ होताना दिसत आहे.