आमदार खासदाराची विक्री ५०-१०० कोटी, शेतकऱ्याला १० हजार! मुख्यमंत्री आणि त्यांचे दोन 'उप'टराव असंवेदनशील, ठाकरेंचा हल्लाबोल

मुंबई : बळीराजाचे राज्य राजकारण्यांनी खाऊन फस्त केले आहे. बळीराजा म्हणजे तोंडी लावायचा आणि चेष्टेचा विषय बनलाय. महाराष्ट्रातील शेतकऱ्यांच्या आत्महत्यांनी राज्यकर्त्यांचे मन हेलावलं नाहीये. शेतकऱ्यांचा संसार दुष्काळात, पाण्यात वाहून गेलाय तरीही राज्यकर्त्यांचे मन द्रवले नाही. मग हे कसले बळीराजांचे राज्य? शेतकरी त्यांच्या न्याय मागण्या सरकार समोर मांडतो तेव्हा राज्याचे मुख्यमंत्री मग्रुरीत त्याला गप्प करतात. चूप बस रे राजकारण करू नकोस, असे त्याला म्हणतात. नुकसान भरपाईची मागणी करणे हे ज्यांना राजकारण वाटते अशा मनवृत्तीचे लोक महाराष्ट्राचे राज्यकर्ते म्हणून बसलेत. आमदार खासदारांची खरेदी विक्री ५०-१०० कोटींना होते. नगरसेवक पन्नास लाखात एक कोटीला विकत घेतला जातो. त्याच महाराष्ट्रात ओल्या दुष्काळात सर्वस्व गमावलेल्या शेतकऱ्यांची बोळवण नुकसान भरपाई म्हणून पाच दहा हजारांवर केली जाते. मुख्यमंत्री फडणवीस आणि त्यांचे दोन 'उप'टराव असंवेदनशील आहेत, अशा शब्दात शिवसेना पक्षप्रमुख उद्धव ठाकरे यांनी राज्य सरकारवर हल्लाबोल केला.