Mixer Grinder Right Use : मिक्सरचे 3 भांडे, मोठं, मध्यम आणि लहान भांडं कोणतं कधी वापरायचं? अनेक गृहिणींना चुकीचा समज

आजच्या आधुनिक स्वयंपाकघरात मिक्सरग्राइंडर ही अत्यावश्यक वस्तू बनली आहे. मसाले वाटणे, चटण्या तयार करणे, ज्यूस बनवणे किंवा सूप बनवणे. हे सगळं काम काही मिनिटांत पूर्ण करणारा हा स्वयंपाकघरातील “सुपरहिरो”च आहे. पण अनेक महिलांना अजूनही एक प्रश्न पडतो की मिक्सरची तीन भांडी असतात, पण कोणतं भांडं कशासाठी वापरायचं? चुकीचं भांडं वापरल्यास पदार्थ व्यवस्थित वाटत नाहीत, आणि कधी कधी मिक्सरलाही त्रास होऊ शकतो. म्हणूनच प्रत्येक भांड्याचा योग्य वापर समजून घेणं गरजेचं आहे.

मिक्सरमध्ये सामान्यतः तीन भांडी असतात- मोठं, मध्यम आणि लहान.मोठं भांडं म्हणजे लिक्विडायझर जार. हे प्रामुख्याने द्रव पदार्थांसाठी वापरलं जातं. यात फळांचे ज्यूस, मिल्कशेक, स्मूदी, टोमॅटो प्युरी किंवा सूप तयार करता येतं. यातील ब्लेड पातळ आणि लांब असतात, ज्यामुळे द्रव पदार्थ चांगले मिसळले जातात. अनेक महिला याला जास्त प्रमाणात वाटप काढण्यासाठी वापर करताता पण त्यांचा वाटप फसतो कारण हा ग्रायंडर मिश्रण चांगलं वाटत नाही.

मध्यम आकाराचं भांडं ओलं वाटणं (wet grinding) यासाठी वापरतात. यात नारळाची चटणी, कांदा-टमाट्याची पेस्ट, मसाले किंवा करीसाठी लागणारी पेस्ट तयार करता येते. हे भांडं जाड ब्लेडचं असतं आणि पाण्याचा योग्य प्रमाणात वापर केला, तर मिश्रण अगदी बारीक होतं.

सर्वात लहान भांडं म्हणजे ड्राय ग्राइंडिंग जार. हे कोरडे मसाले, धणे, मिरची, जिरे, साखर पावडर, कॉफी बिन्स किंवा सुकेफळं वाटण्यासाठी वापरतात. यात झाकण घट्ट बसवलेलं असतं, कारण कोरडे पदार्थ वाटताना धूळ उडू शकते.

मिक्सर वापरण्यापूर्वी भांडं नीट बसवलेलं आहे का हे तपासणं, गरम पदार्थ थंड होऊ देणं आणि वापरल्यानंतर भांडी स्वच्छ धुणं, या छोट्या सवयी पाळल्यास मिक्सर दीर्घकाळ टिकतो.

योग्य भांडं योग्य कामासाठी वापरल्यास केवळ वेळ आणि श्रमच नाही तर तुमच्या स्वयंपाकाची चव आणि गुणवत्ता दोन्ही वाढतात. त्यामुळे पुढच्या वेळी मिक्सर चालू करताना, कोणतं भांडं कशासाठी हे लक्षात ठेवा आणि आपल्या स्वयंपाकाला परफेक्ट स्पर्श द्या.