जातीव्यवस्थेचा कळस... मुलाचा आंतरजातीय विवाह, वंचितकडून सुनेला तिकीट, जात डोक्यात गेलेल्या सासू आणि दीराचा सेनेत प्रवेश

बुलढाणा : आंतरजातीय विवाह केलेल्या तरुणीला वंचित बहुजन आघाडीकडून विधानसभा निवडणुकीचं तिकीट देण्यात आलंय. मुलाच्या कुटुंबियांचा त्यांच्या लग्नाला विरोध होता. आता सुनेला वंचितकडून उमेदवारी मिळाल्यानंतर सासू आणि दिराने शिवसेनेत प्रवेश केला आहे. OBC समाजाच्या वृशांक चव्हाण यांनी कुटुंबाच्या विरोधात जाऊन मागासवर्गीय मुलींशी आंतरजातीय प्रेम विवाह केला होता. कुटुंबात आधीपासूनच त्याला विरोध होता. आता वंचितने उमेदवारी दिल्यानंतर कुटुंबियांकडून उघडपणे विरोध दर्शवला जात आहे.   

मेहकर इथल्या डॉ. ऋतुजा चव्हाण यांना प्रकाश आंबेडकर सर्वेसर्वा असलेल्या वंचित बहुजन आघाडी कडून मेहकर विधानसभा निवडणुकीची उमेदवारी देण्यात आलीय. हा मतदारसंघ SCसाठी राखीव असल्याने त्यांना उमेदवारी देण्यात आली. मात्र ऋतुजा यांच्या सासू आणि दिराचा लग्नामुळे विरोध होताच, आता तो विरोध उघड झाला असून चक्क आपल्या सुनेच्या विरोधात त्यांनी शिवसेनेत जाहीर प्रवेश केला.

पत्नीला सासू आणि दिराने विरोध केला असला तरी पतीने खंबीर साथ दिलीय. पती वृशांक यांनी म्हटलं की, मी पत्नीसोबत आहे. मी आंतरजातीय विवाह करून वंचित बहुजन आघाडीकडून उमेदवारी घेतली असल्याचा राग आई भावाला आहे. माझ्या आई भावांना मागासवर्गीयांचा तिरस्कार असल्यानेच त्यांनी हे पाऊल उचलले असल्याचं पतीने म्हटलं. सरकार जरी आंतरजातीय विवाहाला प्रोत्साहन देत असलं तरी माझ्या घरांच्याचा त्याला कठोर विरोध होता असही वृशांकने सांगितलं.