शिक्षकांचा अजब कारभार, खड्डे बुजवण्यासाठी विद्यार्थ्यांनाच लावलं कामाला!

रस्त्यावर अडथळा ठरणारे खड्डे बुजवण्यासाठी जिल्हा परिषद शिक्षकांनी चक्क शाळकरी विद्यार्थ्यांनाच झुंपल्याची धक्कादायक प्रकरण समोर आलं आहे. गंगापूर तालुक्यात ढोरेगाव- भोळेगावकडे जाणाऱ्या रस्त्यावर हा प्रकार घडला आहे. या घटनेचा व्हिडिओ सोशल मीडियावर व्हायरल झाल्यानंतर पालकांमधून संताप व्यक्त केला जात आहे.

छत्रपती संभाजीनगर जिल्ह्यातील गंगापूर तालुक्यात पेंढापूर येथील जिल्हा परिषद शाळेत पहिली ते सातवीपर्यंत शाळा आहे. या शाळेत 110 विद्यार्थी शिक्षण घेतात. त्यांना शिकवण्यासाठी ६ पुरुष शिक्षक तर ४ महिला शिक्षक कार्यरत आहेत. गंगापूर तालुक्यातील ढोरेगाव येथून आणि भोळेगावकडे जाणाऱ्या रस्त्यावर मोठ्या प्रमाणात खड्डे पडले आहे. या खड्ड्यांमुळे दुचाकीवरून ये जा करणाऱ्या शिक्षकांना त्रास होतो. ही शिक्षकांनी संबंधित विभागाला कळवण्याऐवजी चक्क शाळकरी मुलांना खड्डे बुजवण्यासाठी जुंपलं.  विशेष म्हणजे, आमदार प्रशांत बंब सातत्याने शिक्षकांवर टीका करत असतात. याच आमदाराच्या मतदारसंघांमध्ये रस्त्यावरील खड्डे बुजवण्यासाठी विद्यार्थ्याला सांगितल्याची घटना उघडकीस झाली आहे.

याबाबत शाळेचे मुख्याध्यापकांना विचारला असता ते म्हणाले की, शिष्यवृत्तीच्या बैठकीसाठी मी गंगापूर येथील बैठकीसाठी आलो होतो. यामुळे खड्डे बुजवण्याच्या प्रकारासंदर्भात मला माहिती नाही. मात्र असं काही असेल तर शिक्षकांना समज दिले जाईल, असं पेंढापूर जिल्हा परिषद शाळेचे मुख्याध्यापक विजय इंगळे म्हणाले.