अमेरिकन शेअर बाजारात भूकंप, डाऊ जोन्स कोसळला; उद्या भारतीय मार्केटमध्ये काय होणार? गुंतवणुकदारांची झोप उडाली

सोमवारी बाजारात जोरदार पुनरागमन झाले होते. S&P 500 आणि Nasdaq यांनी दिवसातील मोठी घसरण भरून काढत सौम्य वाढीसह बंद केला होता, तर डाऊही तळाच्या पातळीवरून वर आला होता. मात्र मंगळवारी पुन्हा टेक शेअर्सवर दबाव दिसून आला. Nvidia आणि Broadcom यांचे शेअर्स जवळपास 2 टक्क्यांनी घसरले. अमेरिकन मेमरी स्टॉक्सवरही ताण राहिला. S&P 500 मधील बहुतांश शेअर्स लाल निशाणावर होते; फक्त तेल आणि ऊर्जा क्षेत्रातील शेअर्समध्ये तेजी दिसली.

Financial Times च्या अहवालानंतर Blackstone चे शेअर्स 7 टक्क्यांनी कोसळले. अहवालानुसार कंपनीच्या प्रायव्हेट क्रेडिट फंडमध्ये पहिल्या तिमाहीत 1.7 अब्ज डॉलर्सचा निव्वळ बाहेरचा प्रवाह (नेट आऊटफ्लो) नोंदवला गेला.

मध्यपूर्वेतील संघर्ष तीव्र होत असताना ऊर्जा किमतींमध्ये पुन्हा वाढ झाली. इराणने कतारच्या LNG उत्पादन क्षमतेवर परिणाम केल्यानंतर युरोपमधील नैसर्गिक वायूच्या किमती दोन दिवसांत 70 टक्क्यांहून अधिक वाढल्या.

तेलाच्या किमतींमध्ये तीव्र उसळी पाहायला मिळाली. Brent Crude 8 टक्क्यांच्या वाढीसह प्रति बॅरल 84 डॉलर्सच्या वर पोहोचले. सोमवारीही यात 6 टक्क्यांची वाढ झाली होती. West Texas Intermediate (WTI) क्रूडही 8 टक्क्यांनी वाढून प्रति बॅरल 77 डॉलर्सच्या वर गेले; सोमवारी त्यात 6 टक्क्यांची वाढ झाली होती.