इस्रायल-इराण युद्धाने वाढवलं भारताचं टेन्शन, पेट्रोल-डिझेल स्वस्त होणार नाही का?

भूराजकीय संबंधांचा परिणाम तेलाच्या किमतीवर होतो हे आपण नेहमीच पाहत आलो आहे. आता अमेरिकेने इस्रायलला पाठिंबा दिला आहे. दुसरीकडे अनेक आखाती देश इराणच्या बाजूने उभे राहत आहेत. त्यामुळे येत्या काळात कच्च्या तेलाच्या किमती आणखी वाढण्याची शक्यता आहे. बुधवारी ओपेक प्लसच्या बैठकीत तेलाचा पुरवठा सुरळीत राखण्याबाबत विचार केला जाण्याची शक्यता आहे.

आंतरराष्ट्रीय बाजारात क्रुड ऑइलच्या किमती 80 डॉलर किंवा त्या पलीकडे गेल्या तर भारतात निवडणुकांच्या तोंडावर पेट्रोल डिझेलच्या किमती कमी होण्याची शक्यता मावळेल. सध्या भारत सुमारे 85 टक्के क्रुड ऑइल आयात करतो. क्रुड ऑइलच्या किमती कमी झाल्या तर भारतावरील ताण कमी होतो. देशांतर्गत पेट्रोल डिझेलच्या किमती कमी करायलाही त्याची मदत होते. मात्र आंतरराष्ट्रीय बाजारात क्रुड ऑइलच्या किंमत वाढली की त्याचा फटका भारताच्या अर्थव्यवस्थेला बसतो. आरबीआयच्या रिपोर्टनुसार भारत एकुण आयातीच्या सुमारे 25 टक्के क्रुड ऑइल मिडल ईस्ट आणि रशियाकडून आयात करतो. त्यामुळे आंतरराष्ट्रीय बाजारातील कच्च्या तेलाच्या किमती आणि भारतातील महागाई यांचा जवळचा संबंध आहे.