उद्या शेअर बाजारात ‘शॉक वेव’ येणार, Nifty50 मध्ये मोठी उलथापालथ शक्य; SEBIच्या हालचालींनी गुंतवणूकदारांत खळबळ

स्ट्रॅडल ही एक ट्रेडिंग रणनीती आहे. ज्यामध्ये गुंतवणूकदार एकाच वेळी निफ्टी वाढेल (Bullish) आणि घसरेल (Bearish) या दोन्ही गोष्टींवर पैज लावतो. सामान्यतः एक्सपायरीच्या दिवशी स्ट्रॅडलची किंमत हळूहळू कमी होते. मात्र गेल्या काही वर्षांत अनेक वेळा असं झालं आहे की- स्ट्रॅडलच्या किमती अचानक अनेकपटीने वाढल्या, जे समजण्यापलीकडचं आहे. त्यामुळे काही ट्रेडर्सचा संशय आहे की, मार्केटमध्ये एखादा मोठा खेळाडू मोठी चाल खेळत आहे.

अलीकडेच सेबीने अमेरिकन फर्म Jane Street ग्रुपवर बंदी घातली आहे. कारण त्यांच्यावर इंडेक्समध्ये हेराफेरी केल्याचा आरोप आहे. सेबीच्या आदेशात ‘स्ट्रॅडल’चा थेट उल्लेख नसला, तरी "अनपेक्षित किंमतींतील चढ-उतार" यावर नोंद घेतली गेली आहे. Jane Street ने मात्र हे आरोप फेटाळून लावत सांगितले की, ते केवळ एक सामान्य ट्रेडिंग रणनीती वापरत होते.

आता सेबीने निफ्टी आणि सेन्सेक्ससारख्या मोठ्या इंडेक्सवरही चौकशीचा फास आवळायला सुरुवात केली आहे. मे महिन्यात एक्सपायरी डेवर झालेले काही व्यवहार संशयाच्या भोवऱ्यात सापडले आहेत आणि यावर अधिक सखोल चौकशी केली जात आहे.