Success Story : घरातून क्लाऊड किचन, आता उभारला कॅफे, मायलेकाची जोडी महिन्याला करतेय 8 लाखांची कमाई

कोरोना लॉकडाऊन दरम्यान दादरमध्ये अनेक जणांना जेवणाची अडचण भासत होती. हे पाहून विना प्रभू यांनी तब्बल 800 टिफिन मोफत वाटले. त्या स्वतः उत्तम गायिका आहेत, पण त्याचबरोबर उत्कृष्ट स्वयंपाकही करतात. लोकांना त्यांचा स्वादिष्ट स्वयंपाक आवडू लागला आणि याच अनुभवाने त्यांना मोठं बळ मिळालं. यानंतर त्यांनी घरातूनच वीपी किचन (Vina Prabhu Kitchen) सुरू केलं आणि काही महिन्यांत ते परिसरात खूप लोकप्रिय झालं.

गेल्या वर्षी 2024 मध्ये रुपारेल कॉलेजसमोर त्यांनी मुंबई वाईफ कॅफे सुरू केलं. कॅफे सुरू करताना एकच उद्देश मनात होता, मध्यमवर्गीयांच्या खिशाला परवडणारे, ताजे आणि चविष्ट जेवण द्यायचं. कॅफेमध्ये आज विविध व्हेज-नॉनव्हेज पदार्थ मिळतात. रोज ताजी भाजीच वापरली जाते, शिळा माल मुळीच नाही. दीपेन प्रभू स्वतः दररोज दादर मार्केटला जाऊन घटकसामग्री आणतात, क्वालिटी आणि क्वांटिटी दोन्ही उत्तम प्रकारे देण्याचा प्रयत्न करतात.

आज मुंबई वाईफ कॅफे महिन्याला 7–8 लाखांची उलाढाल करतोय. कोरोनाकाळात मोफत टिफिन देणाऱ्या एक साध्या गृहिणीपासून ते स्वतःचा ब्रॅण्ड उभी करणाऱ्या उद्योजिकांपर्यंतचा विना प्रभू यांचा प्रवास अतिशय प्रेरणादायी आहे. त्यांचा कॅफे आज विद्यार्थ्यांसाठी, तरुणांसाठी आणि चायनीज-लव्हर्ससाठी आवडतं ठिकाण बनलाय.