कुटुंबाची साथ, सूनबाई जोमात! जात्यावरच्या माडग्याला बनवला ब्रँड, घरगुती व्यवसायातून बक्कळ कमाई

माडगे बनविण्यासाठी एक किलो हुलगे स्वच्छ करून लोखंडी तव्यावर भाजले जातात. थंड झाल्यानंतर जात्यावर दळून त्याचे बारीक पीठ तयार करतात. हे पीठ चाळणीने चाळले जाते. तिखट माडग्यासाठी एक किलो हुलगा पीठ, 15 ग्रॅम तिखट, 7 ग्रॅम हळद, 15 ग्रॅम जिरेपूड, 15 ग्रॅम धनेपूड, 40 ग्रॅम सैंधव मीठ आणि 10 ग्रॅम ओवा मिसळून एकत्रित केले जाते. त्यानंतर प्रत्येकी 100 ग्रॅमचे पॅकिंग तयार केले जाते. गोड माडग्यासाठी याच पद्धतीने जात्यावर हुलगा दळून पीठ करतात. 500 ग्रॅम पिठामध्ये 500 ग्रॅम सेंद्रिय गूळ, 20 ग्रॅम वेलदोडा, 20 ग्रॅम जायफळ, 50 ग्रॅम बडीशेप, 5 ग्रॅम सैंधव मीठ मिसळून एकत्रित केले जाते.

माडग्यासाठी तयार पीठाचे पॅकिंग करून बाजारात विक्रीसाठी पाठवले जाते. 100 ग्रॅमच्या एका माडग्याच्या पाकिटाची किंमत 120 ते 150 रुपये आहे. सोलापूर शहर व जिल्हासह मुंबई, पुणे, लातूर, कर्नाटक, सांगली येथून सुध्दा ग्राहकांची या माडग्याला चांगली मागणी आहे. या माडगे विक्रीच्या व्यवसायातून डॉ.स्वाती थिटे या महिन्याला एक लाख रुपयांची उलाढाल करत आहेत. तर सर्व खर्च वजा करून महिन्याला 30 ते 40 हजार रुपये पर्यंतचा नफा त्यांना मिळत आहे.

“आज महिलांना प्रत्येक क्षेत्रात पुढे जाण्यास भरपूर संधी आहे. फक्त तिला गरज प्रोत्साहन देण्याची आहे. जेव्हा एखादे कुटुंब घरातील महिलेला प्रोत्साहन देते, तेव्हा स्त्रिया खूप काही करू शकतात. त्याची तुलना कोणत्याही गोष्टीशी होऊ शकत नाही. त्यामुळे यासाठी महिलांनी पुढे येणे गरजेचे आहे”, असं डॉ.स्वाती थिटे यांनी व्यक्त केला आहे.