Ticket Scam Alert : AI ने बनवला एसी लोकल पास, पण एका चूकीनं सगळं बोंबललं! पोलिसांनी अंबरनाथच्या कपलला कसं पकडलं?

गेल्या काही वर्षात एआयचा वापर वाढलेला आहे. मात्र याच तंत्रज्ञानाचा वापर करुन दाम्पत्यातील पतीने आर्टिफिशियल इंटेलिजन्सच्या मदतीने बनावट डिजिटल पास तयार केल्याची धक्कादायक माहिती पुढे आली आहे. हा पास त्यांनी कल्याण-सीएसएमटी एसी लोकलमधून प्रवास करण्यासाठी केला होता. टीसीच्या जागरूकतेमुळे संपूर्ण प्रकरण समोर आले आणि शेवटी या दोघांना थेट तुरुंगात धाडण्यात आले.

मिळालेल्या माहितीनुसार,बुधवार, 26 नोव्हेंबर 2025 रोजी सकाळच्या गर्दीच्या वेळेत एसी लोकलमध्ये नियमित तिकीट तपासणी सुरू होती. टीसी विशाल नवले हे प्रवाशांची तिकिटे तपासत असताना त्यांना आरोपी महिलेचा पास पाहताना संशय आला. त्यांनी दाखवलेला डिजिटल पास अधिकृत UTS ॲपवर नसून थेट गुगल क्रोम ब्राउझरवर उघडलेला होता. सर्वात महत्त्वाचे म्हणजे डिजिटल पाससाठी आवश्यक असणारा QR कोड त्यात नव्हता.