Naigaon BDD Chawl: नायगाव बीडीडीच्या जागेवर 70 मजली टॉवर, म्हाडाला विक्रीसाठी किती घरं मिळणार?

मुंबईमध्ये घर घेणं सामान्य व्यक्तीला शक्य नाही. त्याच अनुषंगाने म्हाडाकडून मुंबईमध्ये सामान्य व्यक्तींसाठी घरं उपलब्ध केली जात आहे. गेल्या अनेक वर्षांपासून मुंबईतल्या बीडीडी चाळीमध्ये राहणाऱ्या रहिवाशांना आता गगनचुंबी इमारतीमध्ये घर मिळणार आहे. चाळीतून आता ते लोकं मोठमोठ्या बिल्डिंगमध्ये राहायला जाणार आहेत. दरम्यान, नायगाव बीडीडी चाळ प्रकल्पात एकूण 42 जुन्या तीन मजली चाळी असून त्यामध्ये 3,344 एकूण खोल्या आहेत. सुमारे 64 हजार चौरस मीटर क्षेत्रफळ असलेला हा भूखंड दोन भागांत विभागला असून 'अ' भूखंडावर रहिवाशांना द्याव्या लागणाऱ्या 23 मजली इमारती बांधण्यात येणार आहे. त्या 20 इमारती दोन टप्प्यांमध्ये बांधल्या जाणार आहेत.

त्यापैकी, आठ इमारतींचे काम वेगात सुरू असून 1 ते 10 चाळींच्या जागेवर म्हाडा विक्रीयोग्य निवासी इमारत उभारणार आहे. तर दुसऱ्या भुखंडावर म्हणजेच 'ब' भूखंडावर म्हाडाकडून विक्री योग्य सदनिका असलेले 70 मजली तीन इमारती आणि 50 मजली एक इमारत बांधली जाणार आहे. या इमारतीची उंची 243 इतकी आहे. त्याला पालिकेच्या हायराईज कमिटीची परवानगी मिळणे बंधनकारक असल्याचे एका म्हाडाच्या वरिष्ठ अधिकाऱ्यांनी दिली आहे. शिवाय त्यांनी ही परवानगी म्हाडाला मिळाल्याने गगनचुंबी टॉवर उभारण्याचा मार्ग मोकळा झाल्याची माहितीही त्यांनी दिली. चार टॉवरमधले घरं लॉटरीच्या माध्यमातून विक्रीसाठी उपलब्ध होऊ शकणार असल्याची माहिती मिळत आहे.