Mumbai Goa Highway: मुंबई गोवा महामार्गावर या वाहनांना बंदी, गणेशोत्सवाच्या पार्श्वभूमीवर सरकारचा मोठा निर्णय

यंदा देखील गणेश चतुर्थीला सिंधुदुर्ग, रत्नागिरी आणि रायगड जिल्ह्यात जाणाऱ्या चाकरमान्यांची संख्या मोठी असते. यासाठी प्रशासनाकडून महत्त्वाची पाऊले उचलली जात आहेत. नियमित जाणाऱ्या एसटी बससह जवळपास 3 हजार जादा बस चालवण्यात येणार आहेत. त्यामुळे 23 ते 26 ऑगस्ट दरम्यान मुंबई – गोवा महामार्गावर वाहनांची मोठी वर्दळ असणार आहे. त्यामुळे वाहतूक कोंडीची शक्यता आहे.

गणेशोत्सव काळात वाहतूक कोंडीची शक्यता असल्याने यंदा देखील अवजड वाहनांना मुंबई – गोवा महामार्गावर वाहतूक बंदी असणार आहे. याबाबत लवकरच एक प्रसिद्धी पत्रक काढण्यात येणार असल्याचे एका वरिष्ठ अधिकाऱ्याने सांगितले. ही बंदी गणेश चतुर्थीच्या काळात राहणार असली तरी अत्यावश्यक सेवेतील गाड्यांना मात्र वाहतुकीची मुभा देण्यात येणार आहे.

दरम्यान, मुंबई गोवा महामार्गावरील वाहतूक कोंडीवर नियंत्रण ठेवण्यासाठी वाहतूक पोलिसांची टीम ठीक ठिकाणी कार्यरत असेल. तसेच बंद पडणाऱ्या गाड्यांमुळे होणारी वाहतूक कोंडी टाळण्यासाठी देखील ‘टोविंग व्हॅन’ तैनात करण्यात येणार आहेत.