Digital Lounge : लोकलचा खोळंबा झाला? आता नो टेन्शन, स्टेशनवरच करता येणार ऑफिसचं काम, पाहा कसं?

पश्चिम रेल्वेने मुंबई सेंट्रल रेल्वे स्थानकावर भारतीय रेल्वेतील पहिले अत्याधुनिक डिजिटल लाउंज आणि को-वर्किंग स्पेस सुरू केले आहे. सुमारे 1712 चौरस फूट क्षेत्रफळात उभारलेले हे लाउंज विमानतळावरील प्रीमियम सुविधांच्या धर्तीवर विकसित करण्यात आले असून, यामुळे प्रवाशांचा प्रवास अधिक आरामदायी आणि उपयोगी ठरणार आहे.

या डिजिटल लाउंजमध्ये हाय-स्पीड वाय-फाय, मोबाईल आणि लॅपटॉपसाठी अनेक चार्जिंग पॉइंट्स, तसेच खुर्च्या, टेबल आणि सोफ्यांसह आरामदायी बसण्याची व्यवस्था करण्यात आली आहे. वैयक्तिक कामासाठी मॉड्यूलर वर्कस्टेशन्स उपलब्ध असून महत्त्वाच्या चर्चा, मीटिंग्ज किंवा व्हिडिओ कॉन्फरन्ससाठी स्वतंत्र कॉन्फरन्स आणि मीटिंग रूम्स देखील देण्यात आल्या आहेत. याशिवाय, प्रवाशांच्या सोयीसाठी सेल्फ-सर्व्हिस लाईट रिफ्रेशमेंट्स, नॉन-अल्कोहोलिक पेये आणि अपग्रेड केलेल्या टॉयलेट आणि वॉशरूम सुविधाही येथे उपलब्ध आहेत.