इतिहास घडवणारी पहिली मिस इंडिया काळाच्या पडद्याआड, वयाच्या 81 व्या वर्षी घेतला अखेरचा श्वास

देशातील पहिल्या फेमिना मिस इंडिया मेहर कॅस्टेलिनो यांचे वयाच्या 81 व्या वर्षी निधन झाले आहे. फेमिना मिस इंडिया ऑर्गनायजेशनने त्यांची निधनाची बातमी दिली आहे. मेहर कॅस्टोलिनो हे फॅशन जगतातील मोठं नाव आहे. जगभरात आपल्या कामाने त्यांनी स्वत:चं विशेष स्थान निर्माण केलं होतं.

1960 आणि 1970 च्या दशकात मेहर कॅस्टेलिनो यांनी आपल्या मेहनत आणि प्रतिभेच्या जोरावर फॅशन इंडस्ट्रीत स्वत:ची वेगळी ओळख निर्माण केली होती. देशातील पहिल्या मिस इंडिया न होता मेहरा यांनी फॅशन जर्नलिज्समला एक नवी दिशा दिली. मेहर कॅस्टेलिनो यांच्या पश्चात आता त्यांचा मुलगा कार्ल, सून निशा आणि मुलगी क्रिस्टिना आहे.

मेहर कॅस्टेलिनो यांचा जन्म मुंबईत झाला आहे. 1964 मध्ये त्यांनी फेमिना मिस इंडिया हा किताब आपल्या नावे केला. तसेच मिस यूनिवर्स आणि मिस यूनायटेड नेशन्समध्ये त्यांनी भारताचं प्रतिनिधित्व केलं. फक्त ग्लॅमरमध्ये न अडकता त्यांनी पत्रकारितेत पाऊल टाकलं. फॅशन पत्रकारिता त्यांनी अतिशय गांभीर्याने केली.

मेहर कॅस्टेलिनो यांच्या पत्रकारितेच्या करिअरची सुरुवात 1973 मध्ये झाली. ईव्स वीकलेमध्ये त्यांचा पहिला लेख प्रकाशित झाला होता. त्यानंतर त्या खऱ्या अर्थाने फॅशन पत्रकार झाल्या. 130 राष्ट्रीय, आंतरराष्ट्रीय वर्तमानपत्रे आणि मासिकांमध्ये त्यांचे लेख छापले जात असे. फॅशन आणि लाइफस्टाईलसाठी त्यांनी मोलाचं योगदान दिलं आहे.

मेहर कॅस्टोलिनो यांनी फॅशन या विषयावर अनेक पुस्तके लिहिली आहेत. यात 'मेनस्टाइल','फॅशन कॅलिडोस्कोप' आणि 'फॅशन म्युजिंग्स' या पुस्तकांचा समावेश आहे. या पुस्तकात त्यांनी फॅशन ट्रेंड्स, इंडस्ट्रीतील विकास आणि स्टाइलबाबत सर्वसामान्यांना कळेल अशा भाषेत भाष्य केलं आहे.

मेहर कॅस्टेलिनो यांनी लॅक्मे फॅशन वीकसारख्या अनेक महत्त्वाच्या फॅशन वीकसाठी फॅशन लेखक म्हणून काम केलं आहे. अनेक फॅशन संस्था मेहर यांना परीक्षक म्हणून किंवा वक्ता म्हणूनही बोलावायचे.

मेहर कॅस्टेलिनो यांच्या मते, फॅशन म्हणजे फक्त ग्लॅमर नव्हे. तसेच त्यांची पत्रकारिता फक्त फॅशनपुरती मर्यादित नव्हती. तर त्यांनी ब्यूटी, लाइफस्टाइल, ट्रॅवल, फॅशन अशा विविध विषयांवर लेख लिहिले आहेत. मेहर कॅस्टेलिनो यांनी अनेकदा लोकांना प्रेरणा दिली आहे.