Mumbai News : हॉलिवूड अभिनेत्याच्या प्रेमात आंधळी अन् झटक्यात कंगाल झाली, भामट्या सोबतचा रोमान्स पडला महागात

डेहराडूनमध्ये तर आपल्या कोणी ओळखीचे नाही, मग आईने पैसे कोणाला पाठवले? असा प्रश्न त्या मुलीच्या मनामध्ये उद्भवला. त्यानंतर लगेचच तिने आईला बऱ्याचदा या प्रश्नाचं उत्तर विचारण्याचा प्रयत्न केला, पण तिच्या आईने उत्तर देण्याचं टाळाटाळ केलं. पण नंतर आईने जे काही सांगितलं ते ऐकून मुलीला धक्का बसला. वृद्ध महिलेला काही दिवसांपूर्वी इन्स्टाग्रामवर कॅनेडियन अभिनेता आणि गायक केयानू रिव्हज याची फ्रेंड रिक्वेस्ट आली. रिक्वेस्ट आल्यानंतर त्यांच्यात बोलणं सुरू झालं. ती महिला आणि कॅनेडियन अभिनेता इन्स्टाग्रामवर आणि टेलिग्रामवरही संपर्कात होते.

सोशल मीडिया प्लॅटफॉर्मवर बोलत असताना त्यांच्यातील जवळीक अधिकच वाढली. मेसेजवर बोलताना ती वृद्ध महिला अभिनेत्याच्या व्यक्तिमत्व आणि बोलण्यावर भाळली आणि त्याच्या प्रेमात पडली. त्या अभिनेत्यानेही तिला भेटण्यासाठी भारतात येणार असल्याचं सांगितले. त्यासाठी त्याला भारतीय चलनाची गरज असल्याचे त्याने तिला सांगितले. त्याने आयडीबीआय बँकेच्या एका खात्यावर पैसे पाठवायला सांगितले. त्यानुसार वृध्द महिलेने डेहराडून येथील आशा नहार नावाच्या अज्ञात व्यक्तीच्या बँक खात्यावर 65 हजार रूपये पाठवले. हा अभिनेता तोतया असून फसवणुकीचा प्रकार असल्याचे मुलीने आईला सांगितले.

वृद्ध महिलेला इन्स्टा रिक्वेस्ट पाठवणारा व्यक्ती तो कॅनेडियन अभिनेता आणि गायक नव्हता. अभिनेता आणि गायकाच्या नावाने एका तोतया व्यक्तीने खोटं अकाऊंट उघडून त्या वृद्ध महिलेला फसवलं. हा अभिनेता एक भामटा होता. त्याने अभिनेत्याच्या नावाने बनावट खाते उघडून महिलेला जाळ्यात ओढले आणि तिची आर्थिक फसवणूक केली. याप्रकरणी वर्सोवा पोलीस ठाण्यात फसवणुकीचा गुन्हा दाखल करण्यात आला आहे. वृद्ध महिलेने दाखल केलेल्या तक्रारीवरून पोलिसांनी अज्ञात व्यक्तीविरोधात भारतीय न्याय संहितेच्या कलम ६६ (क), ६६ (ड) आणि फसवणुकीचे कलम ३१८ (४) अन्वये गुन्हा दाखल केला.

दिवसेंदिवस सायबर गुन्हेगारीमध्ये मोठ्या प्रमाणावर वाढ होत आहे. अनेक वेगवेगळ्या गोष्टींचा फायदा घेत सायबर भामटे लोकांची विविध प्रकारे फसवणूक करीत असतात. त्यामुळे कुणाशीही आर्थिक व्यवहार करताना सावधगिरी बाळगावी, असं आवाहन अनेकदा पोलिसांनी नागरिकांना केलं आहे.