Maharashtra Elections 2024: महायुतीमध्येही नाराजीनाट्य, उमेदवार यादीवरून शिंदे गट भाजपवर नाराज

उदय जाधव, प्रतिनिधी, मुंबई : विधानसभा निवडणूक जाहीर झाल्यानंतर भारतीय जनता पक्षाने (भाजप) रविवारी, (20 ऑक्टोबर) आपल्या 99 उमेदवारांची यादी जाहीर केली. भाजपने या यादीत शिवसेनेच्या ताब्यात असणाऱ्या 5 जागांवरही उमेदवार जाहीर केले. मात्र, भाजपच्या या पवित्र्याने शिवसेना शिंदे गट नाराज झाला आहे. शिवसेनेला विचारात न घेता भाजपने जाहीर केलेल्या यादीबाबत कालच्या बैठकीत नाराजी व्यक्त करण्यात आल्याची माहिती सूत्रांनी दिली. त्याशिवाय कल्याण पूर्वमधून गणपत गायकवाड यांच्या पत्नी सुलभा गायकवाड यांना उमेदवारी देण्यात आली. त्यावरही मुख्यमंत्री एकनाथ शिंदे यांनी नाराजी व्यक्त केली असल्याचे सूत्रांनी सांगितले.