Mumbai News: रेल्वे स्टेशन टू मेट्रो स्टेशन, ‘Metro 4’ वरील स्थानक आता कांजूरमार्ग रेल्वे स्थानकाला जोडणार!

मुंबई महानगर प्रदेश विकास प्राधिकरणाने (एमएमआरडीए) प्रवाशांना मेट्रो आणि रेल्वेच्या माध्यमातून इच्छितस्थळ गाठणे सोपे व्हावे यासाठी अनेक सोप्पे मार्ग काढत आहे. घाटकोर आणि अंधेरी रेल्वे स्थानकावर ट्रायल घेतल्यानंतर आता एमएमआरडीएकडून पुन्हा एकदा प्रवाशांना इच्छितस्थळी पोहोचवण्यासाठी रेल्वे आणि मेट्रोची जोडणीचे प्रयत्न केले जात आहे. त्यानुसार अनेक मेट्रो स्थानके भविष्यात रेल्वे स्थानकांसोबत जोडली जाण्याची शक्यता आहे. या निर्णयाप्रमाणे विक्रोळी मेट्रो स्थानक कांजूरमार्ग रेल्वे स्थानकाला थेट जोडण्यात येणार आहे.. अंदाजे 740 मीटर लांबीच्या पादचारी पुलाद्वारे ही जोडणी केली जाणार असून यासाठी 93 कोटी रुपये खर्च अपेक्षित आहे.

मेट्रो आणि रेल्वेच्या पादचारी पुलाच्या माध्यमातून दोन्हीही बाजूच्या प्रवाशांना थेट विक्रोळी मेट्रो स्थानकातून कांजूरमार्ग रेल्वे स्थानकात किंवा कांजूरमार्ग रेल्वे स्थानकातून विक्रोळी मेट्रो स्थानकात पोहचता येणार आहे. यामुळे मुंबईच्या पूर्व व मध्य उपनगरांमधून प्रवास करणाऱ्या प्रवाशांना विशेषतः फायदा होईल. या प्रोजेक्टचे उद्दिष्ट वाहतूक सुलभ होणे आणि मेट्रो- लोकल या सार्वजनिक वाहतुकीमध्ये अखंड कनेक्टिव्हिटी निर्माण करणे, असे अधिकाऱ्यांचे म्हणणे आहे. एमएमआरडीएने या पादचारी पुलाच्या बांधकामासाठी कंत्राटदाराची नियुक्ती करण्याचा निर्णय घेतला आहे. त्यासाठी नुकतीच निविदा प्रसिद्ध केली आहे.

निविदा अंतिम करून या पादचारी पुलाच्या कामाला सुरुवात करण्याचे एमएमआरडीएचे नियोजन आहे. या पुलाचे काम 18 महिन्यांत पूर्ण करावे लागणार आहे. या पादचारी पुलावर एक सरकता जिना आणि एक लिफ्ट असणार आहे. यामुळे प्रवाशांना गर्दीच्या वेळेमध्ये जाणे- येणे खूपच सोप्पं होणार आहे. प्रवाशांच्या सुरक्षिततेसाठी या पादचारी पुलावर 25 सीसीटीव्ही कॅमेरे बसविले जाणार आहेत. या पादचारी पुलामुळे प्रवाशांचा मेट्रो स्थानक ते रेल्वे स्थानक प्रवास थेट, सुकर होणार आहेच, पण त्याचबरोबर मेट्रो, रेल्वे स्थानकालगतच्या बेस्ट बस थांब्यावर, रिक्षा-टॅक्सी स्टॅण्डवर पोहोचून इच्छित स्थळ गाठणेही प्रवाशांना सोपे होणार आहे.