Mumbai Local : मुंबई लोकलचा प्रवास फुकटात, हे ॲप वापरून रेल्वेलाच चुना, मुंबईत हे काय सुरूये?

नेमकं घडतय तरी काय?

लोकल तिकीट किंवा सीझन पास अधिकृतपणे यूटीएस अॅपमधून सहज मिळू शकतात. पण काही प्रवाशी त्याचा फायदा न घेता खोटे स्क्रीनशॉट, एडिट केलेली तारीख आणि बनावट क्यूआर कोड वापरून रेल्वेची फसवणूक करत आहेत. 2025 च्या जुलै महिन्यात पश्चिम रेल्वेला असा पहिला बनावट यूटीएस पास सापडला. मात्र त्यानंतर काही महिन्यांतच अशी अनेक प्रकरणे उघड झाली. विशेषतः एसी लोकल सुरू झाल्यापासून हा प्रकार आणखी वाढल्याचे रेल्वे प्रशासनाचे निरीक्षण आहे.

अलीकडेच मंगळवारी विरार एसी लोकलमध्ये एका प्रवाशाला अशीच बनावट तिकीट दाखवताना पकडले. नायगाव स्थानकात सायंकाळी तपासणी सुरू असताना त्या व्यक्तीने यूटीएस अॅपवरचे तिकीट दाखवले. पहिल्यांदा ते खरे वाटले, पण क्यूआर कोड स्कॅन करताच त्रुटी दिसून आल्या. तपासणी अॅपमध्ये ते तिकीट मुळातच अस्तित्वात नसल्याचे स्पष्ट झाले. त्या प्रवाशाने जुन्या तिकीटाचा स्क्रीनशॉट घेऊन त्यावर तारीख बदलून नवे तिकीट असल्याचा भास निर्माण केला होता. त्याच्यावर त्वरित गुन्हा दाखल करण्यात आला आणि वसई पोलिसांकडे तक्रार देण्यात आली. याशिवाय दंड देखील आकारण्यात आला.

रेल्वे अधिकार्‍यांच्या म्हणण्यानुसार, मागील दोन वर्षांत विशेषतः पश्चिम रेल्वे विभागात यूटीएस अॅपचा गैरवापर करणाऱ्या प्रवाशांची संख्या वाढली आहे. एसी लोकलमध्ये असे प्रकार सर्वाधिक आढळत आहेत. त्यामुळे रेल्वे प्रशासनाने तिकीट तपासणी आणखी कडक करण्याचे आदेश दिले आहेत. क्यूआर कोडची तपासणी, सीझन पासची बारकाईने चाचणी आणि संशयित तिकिटांवर तात्काळ कारवाई करण्याचे निर्देश देण्यात आले आहेत. रेल्वेने प्रवाशांना अधिकृतपणेच तिकीट खरेदी करण्याचे आवाहन केले असून फसवणूक करणाऱ्यांवर कठोर कारवाई होणार असल्याचे स्पष्ट केले आहे.