बेपत्ता लोकांना शोधणारा देवदूत, तब्बल 351 जणांना मिळवून दिलं कुटुंब! नेमकं काय केलं?

मुंबई: आपला नोकरी धंदा सांभाळून काहीजण समाजसेवेचं व्रतही जपतात. मुंबईतील शिवाजी खैरनार यांनीही असंच एक व्रत जपलंय. बेपत्ता व्यक्तींसाठी जणू ते देवदूतच ठरत आहेत. आतापर्यंत त्यांनी तब्बल 351 हरवलेल्या लोकांना आपलं घर पुन्हा मिळवून दिलंय. त्यांच्या या कार्याची दखल जागतिक पातळीवरही घेण्यात आलीय. वर्ल्ड बुक ऑफ रेकॉर्ड लंडन यांनी त्यांना सन्मानित केलंय.

शिवाजी खैरनार हे 2018 पासून एक सुज्ञ नागरिक या नात्यानं पोलीस मित्र म्हणून काम करतात. एखादी व्यक्ती हरवल्याचं प्रकरण समजलं की ते त्याचा शोध सुरू करतात. सोशल मीडियाचा प्रभावी वापर करून हा शोध घेतला जातो. "मी स्वतः बृहन्मुंबई सार्वजनिक गणेशोत्सव समन्वय समितीचा सहकार्यवाह असल्यामुळे मुंबईमधील गणेशोत्सव मंडळांच्या व्हाट्सअप ग्रुपवर व दहीहंडी समन्वय समितीमध्ये असल्यामुळे दहीहंडी मंडळाच्या ग्रुपवर माहिती देतो. तसेच नवरात्र उत्सव मंडळ, विविध सामाजिक ग्रुपमध्येही हरवलेल्या व्यक्तीची माहिती देऊन शोध घेतो," असे शिवाजी सांगतात.