Mumbai News : दहा वर्षांच्या प्रतीक्षेनंतर अखेर मुहूर्त? सॅण्डहर्स्ट रोडवरील हँकॉक पुलाच्या कामाबद्दल सर्वात मोठी अपडेट आली समोर

2016 साली हा पूल जुना आणि धोकादायक ठरल्याने पाडण्यात आला होता. त्यानंतर महापालिकेने नवीन पूल उभारण्याची घोषणा केली. 2019 पर्यंत काम पूर्ण होईल, असे सांगण्यात आले होते. परंतु आज जवळपास दहा वर्ष उलटूनही हा पूल पूर्ण झालेला नाही.

या प्रकल्पातील मुख्य अडथळा म्हणजे म्हाडाच्या जुन्या इमारती. पुलाच्या पोहोच रस्त्यासाठी सुमारे सहा ते सात इमारती पाडाव्या लागणार आहेत. या इमारतींमध्ये अनेक कुटुंबे आणि व्यावसायिक गाळेधारक राहत आहेत. त्यांचे पुनर्वसन कोण करणार म्हाडा की पालिका यावरून दोन्ही यंत्रणांमध्ये वाद सुरू आहे. म्हाडा म्हणते, ''हा प्रकल्प पालिकेचा आहे,''तर पालिका म्हणते, ''इमारती म्हाडाच्या आहेत, त्यामुळे पुनर्वसन त्यांचे'' या जबाबदारी ढकलण्याच्या खेळामुळे पुलाचे काम थांबले आहे.

हँकॉक पूल बंद असल्याने परिसरातील वाहतुकीचा ताण वाढला आहे. प्रवाशांना पर्यायी मार्गांचा वापर करावा लागतो. त्यामुळे प्रवासाचा वेळ दुप्पट होतो. पावसाळ्यात परिस्थिती आणखी बिकट होते. ''दहा वर्षांपूर्वी पूल पाडला, पण आजतागायत पूर्ण झाला नाही. शहर मेट्रो बनतंय, पण आमचा पूल अजूनही नाही,''अशी खंत स्थानिक नागरिकांनी व्यक्त केली.