विधानसभा निवडणूक लढविण्याची स्वरा भास्करच्या नवऱ्याची तयारी, महाविकास आघाडीकडे तिकीट मागितले

सूत्रांनी दिलेल्या माहितीनुसार फहद अहमद यांना अणुशक्तीनगरमधून विधानसभा निवडणूक लढवायची आहे. महाविकास आघाडीचा घटकपक्ष असलेल्या समाजवादी पक्षाकडे फहद यांनी उमेदवारी मागितली असल्याची माहिती कळते आहे. जर समाजवादी पक्षाने तिकीट दिले तर नक्कीच विधानसभेला सामोरे जाणार असल्याचे फहद अहमद यांनी सूत्रांना सांगितले. सध्या अणुशक्तीनगरचे प्रतिनिधित्व नवाब मलिक करत आहेत. मात्र यंदाच्या वर्षी त्यांची लेक सना मलिक यांना उमेदवारी मिळण्याची शक्यता आहे. त्यामुळे अणुशक्तीनगरमधून चुरशीची लढत होण्याची शक्यता निर्माण झाली आहे.

फहद अहमद यांच्यावर समाजवादी पक्षाच्या युवक संघटनेची जबाबदारी आहे. महाराष्ट्रात समाजवादी पक्षाचे संघटन वाढविण्यासाठी गेली अनेक महिने ते काम करत आहेत. याकामी त्यांना मुंबईतरी काही अंशी यश आले आहे.

बॉलिवूडमधील प्रख्यात अभिनेत्री स्वरा भास्कर हिने राजकीय नेता तसेच सामाजिक कार्यकर्ता फहाद अहमदशी गेल्या वर्षी लग्नगाठ बांधली. ६ जानेवारी २०२३ ला स्वरा आणि फहादने कोर्ट मॅरेज पद्धतीने लग्न केले. त्यांच्या लग्नाची संपूर्ण देशभरात चर्चा झाली.