मुंबईकर वीकेंडला बाहेर पडायचा प्लॅन करताय? मेट्रो 3 चं वेळापत्रक बदललं, पाहा पहिली फेरी कधी?

मुंबईत 2026 ची टाटा मुंबई मॅरेथॉन येत्या रविवारी 18 जानेवारी रोजी आयोजित करण्यात आली आहे. या मॅरेथॉनमध्ये हजारो धावपटू सहभागी होणार असून त्यांना वेळेत सुरुवातीच्या ठिकाणी पोहोचता यावे यासाठी मुंबई मेट्रो 3 अर्थात ॲक्वा लाईनकडून विशेष व्यवस्था करण्यात आली आहे. मॅरेथॉनच्या दिवशी पहाटेपासूनच मेट्रो सेवा सुरू ठेवण्याचा निर्णय मेट्रो प्रशासनाने घेतला आहे.

धावपटू आणि प्रवाशांच्या सोयीसाठी ॲक्वा लाईनवर अतिरिक्त आणि लवकर सुरू होणाऱ्या मेट्रो गाड्या चालवण्यात येणार आहेत. यामध्ये पहिली मेट्रो सकाळी 3:30 वाजता आरे जेव्हीएलआर आणि कफ परेड या दोन्ही टर्मिनल्सवरून सुटणार आहे. त्यानंतर सकाळी 4:30 वाजता आरे जेव्हीएलआर येथून दुसरी मेट्रो धावणार आहे. तसेच सकाळी 4:50 वाजता कफ परेड येथून दुसरी मेट्रो सेवा उपलब्ध असेल.