Jalna Lathi Charge : 'शिंदेंचं सरकारवर कंट्रोल नाही, तिथं बसण्याची' उद्धव ठाकरेंचा मुख्यमंत्र्यांवर जोरदार पलटवार

उद्धव ठाकरे यांनी मुंबईत पत्रकार परिषद घेत सत्ताधाऱ्यांवर पुन्हा एकदा तोफ डागली आहे. ठाकरे म्हणाले, संयम फक्त आंदोलकांनी पाळला पाहिजे असं नाही, जर मुख्यमंत्री म्हणत असतील आम्ही लाठ्या कशा मारू? याचा अर्थ एकनाथ शिंदे यांचं सरकारवर कंट्रोल नाही. मुख्यमंत्री म्हणून तुम्ही तिथे बसण्याचे त्या क्षमतेचे नाही. तुम्ही सुद्धा राजीनामा दिला पाहिजे. राजीनामा द्या मग माझं कुणी ऐकत नाही असं म्हणा.

जालन्यात लाठीचार्जसाठी मंत्रालयातून आदेश आले हे सिद्ध करा, असं आव्हान उपमुख्यमंत्री अजित पवार यांनी विरोधकांना केलं होतं. यावर बोलताना ठाकरे म्हणाले, असे पुरावे ज्यांनी तुमच्याविरोधात भ्रष्टाचाराचे आरोप केले, त्यांच्याकडे सुद्धा होते. तरी सुद्धा त्यांनी तुम्हाला सोबत घेऊन उपमुख्यमंत्री केलं ना? आता त्यांच्याकडे भ्रष्टाचाराचे पुरावे मागतील पाहिजे. पुरावे पुरावे म्हणताय, पंतप्रधान मोदी यांनी 70 हजार कोटींचा घोटाळ्याचा आरोप केला होता, आता त्यांच्याकडे पुरावे मागा. जर त्यांचं म्हणणं लाठीचार्ज करण्याचा आदेश दिला नाही. तर त्यांचा प्रशासनावर वचक नाही. मी होतो, माझ्यावेळी मराठा समाजाने सुद्धा आंदोलनं केली होती. कोणत्याही आंदोलकांनी माझ्याकडे भेटण्याची वेळ मागितली, त्यावेळी आम्ही वेळ दिला होता. आजचे उपसुद्धा त्यावेळी माझ्यासोबत होते, आम्ही सगळ्यांनी मिळून तोडगा काढला होता, अशीही माहिती ठाकरे यांनी दिली.