प्रभादेवी रेल्वे स्थानकातील गर्दी कमी करण्यासाठी पश्चिम रेल्वेकडून लोकल थांब्यात बदल, गर्दी विभागण्यासाठी मोठा निर्णय

परळ- एल्फिन्स्टन पूल पुनर्बांधणीच्या कामांमुळे प्रभादेवी रेल्वे स्थानकामध्ये प्रवाशांच्या गर्दीचे प्रमाण लक्षणीय रित्या वाढले होते. गर्दीचे प्रमाण, लक्षात घेता पश्चिम रेल्वेने अनेक मुख्य उपाय योजना सुरू केल्या आहेत. स्थानकाच्या दक्षिण दिशेच्या पुलावरील गर्दी कमी करण्यासाठी लोकलचे तीन डबे मागे थांबवण्यात येणार असल्याचा निर्णय रेल्वे प्रशासनाने घेतला आहे. बुधवारी झालेल्या चेंगराचेंगरी सदृश्य परिस्थिती नंतर रेल्वेने प्रवाशांच्या दृष्टीने महत्त्वाचा निर्णय घेतला आहे.

बुधवारी चेंगराचेंगरीजन्य परिस्थिती निर्माण झाल्यानंतर 24 तासांतच पूल पुन्हा सुरू करण्यात आला. परळ- एल्फिन्स्टन पूल तोडून एमएमआरडीए वरळी-शिवडी कनेक्टर उभारण्याचे काम युद्ध पातळीवर सुरू आहे. हा पूल डबलडेकर पूल असणार आहे. प्रभादेवी रेल्वे स्टेशनवरील दक्षिण दिशेच्या पुलावरील गर्दी कमी करण्यासाठी लोकलच्या थांब्यामध्ये बदल करण्याचा निर्णय घेण्यात आल्याची माहिती पश्चिम रेल्वेचे मुख्य जनसंपर्क अधिकारी विनित अभिषेक यांनी दिली आहे.

मध्य आणि पश्चिम रेल्वेला जोडणारे प्रभादेवी रेल्वे स्टेशनवर 12 मीटर आणि 6 मीटर रुंदीचे दोन पादचारी पूल आहेत. स्थानकाच्या पूर्व आणि पश्चिम दिशेला जोडणाऱ्या दक्षिण पादचारी पुलावर अधिक गर्दी होते. येत्या आठवड्यात एल्फिन्स्टन पुलावरील पादचारी भाग बंद होणार असल्यामुळे स्थानकातील पादचारी पुलावरील गर्दीमध्ये वाढ होण्याची शक्यता आहे. यामुळे दक्षिणेकडील पुलावरील गर्दी विभागण्यासाठी अतिरिक्त जिना आणि सरकते जिने जोडण्याचा प्रस्ताव तयार केला आहे.