Wild Boar Killing Bihar: बिहारमध्ये दिसताक्षणी या प्राण्यांना गोळ्या घालण्याचे आदेश; खास शूटर मागावले

पाटना : अमेरिकेने लाखो घुबडांना मारण्याचा निर्णय घेतल्याची बातमी काही दिवसांपूर्वी आली होती. त्यानंतर रोमानियानेदेखील आपल्या देशातल्या अस्वलांना मारण्याचा निर्णय घेतला होता. भारतामध्येही असाच एक निर्णय घेण्यात आला आहे. बिहार सरकार नीलगाय आणि रानडुकरांना मारण्याची मोहीम राबवणार आहे. या जनावरांमुळे शेतकऱ्यांच्या पिकांचं नुकसान होत आहे. या कामासाठी पर्यावरण, वन आणि हवामानबदल विभागातले 13 व्यावसायिक नेमबाज तैनात करण्यात येणार आहेत. नीलगाय आणि रानडुकरं दिसताच त्यांना गोळ्या घातल्या जातील. या प्राण्यांना मारण्यापासून ते दफन करण्यापर्यंतच्या संपूर्ण प्रक्रियेत सरपंचाची भूमिका महत्त्वाची असेल, असं विभागाने एका निवेदनात म्हटलं आहे.