ममता बॅनर्जींचा अपघात की घात? नेमकं काय घडलं? हॉस्पिटलच्या अधिकाऱ्याने दिली खळबळजनक माहिती

गुरुवारी (14 मार्च) ममता बॅनर्जींसोबत यांच्यासोबत मोठी घटना घडली. त्या पडल्या आणि गंभीर जखमी झाल्या. त्यांच्या कपाळाला मोठी दुखापत झाली. गंभीर अवस्थेत त्यांना कोलकाता येथील सरकारी एसएसकेएम रुग्णालयात दाखल करण्यात आलं.

पश्चिम बंगालच्या मुख्यमंत्री ममता बॅनर्जी यांच्या कालीघाट येथील घरात मागून ढकलून दिल्याने त्या कोसळल्या. एसएसकेएम रुग्णालयाच्या अधिकाऱ्यांनी ही माहिती दिली. मुख्यमंत्री गुरुवारी रुग्णालयातून घरी परतल्यानंतर एसएसकेएमचे संचालक मनिमॉय बॅनर्जी म्हणाल्या, "मागून ढकलल्यामुळे ममता बॅनर्जी पडल्या. मुख्यमंत्र्यांना सायंकाळी साडेसातच्या सुमारास रुग्णालयात आणण्यात आले. त्यांच्या डोक्याला दुखापत झाली आहे. कपाळावर खोल जखम आहे. जखमेतूनही खूप रक्त निघालं आहे. मुख्यमंत्र्यांच्या कपाळावर तीन आणि नाकाला एक टाका पडला आहे."

"रुग्णालयातील न्यूरोसर्जरी, मेडिसीन आणि कार्डिओलॉजी विभागाच्या प्रमुखांनी मुख्यमंत्र्यांची भेट घेतली. त्यांच्या जखमेवर मलमपट्टी लावली. ईसीजी, सीटी स्कॅनसह अनेक चाचण्या करण्यात आल्या. त्यांना रात्रभर रुग्णालयात राहण्याचा सल्ला देण्यात आला. पण त्यांना घरी परत जायचं होतं. त्यामुळे त्यांना घरी जाण्याची परवानगी देण्यात आली", असं मनिमॉय यांनी सांगितल्याचं वृत्त टीव्ही 9 दिलं आहे.

दुसरीकडे त्यांना कोणीही मागून ढकललं नाही, उलट डोकं फिरवल्यामुळे त्यांना कोणीतरी मागून ढकलल्यासारखं वाटू शकतं, त्या अडखळल्या आणि पडल्या,  असं इतर तज्ज्ञ डॉक्टरांचं म्हणणं आहे.