मनसा देवी मंदिरात चेंगराचेंगरी, रेलिंगमध्ये करंटची अफवा; 6 जणांचा दुर्दैवी अंत, आकडा वाढण्याची भीती

प्रत्यक्षदर्शींच्या माहितीनुसार, ही चेंगराचेंगरी सकाळच्या सुमारास उसळली, जेव्हा दर्शनासाठी आलेल्या हजारो भाविकांनी मंदिरात प्रवेश करण्याचा प्रयत्न केला. गर्दी इतकी वाढली की, काही लोक घसरले आणि पडले, त्यांच्यावर इतर भाविक चढले. त्यामुळे अनेकांना गंभीर दुखापत झाली.

हरिद्वारचे वरिष्ठ पोलीस अधीक्षक प्रमेंद्र डोभाल यांनी सांगितले की-प्राथमिक तपासात असे समोर आले आहे की, मंदिराच्या पायऱ्यांपासून सुमारे 100 मीटर खाली असलेल्या रेलिंगमध्ये करंट प्रवाहित असल्याची अफवा पसरली होती. ही अफवा ऐकून लोकांमध्ये भीती निर्माण झाली आणि लोक एकमेकांना चिरडत पळू लागले. यामुळे चेंगराचेंगरी झाली.

उत्तराखंडचे मुख्यमंत्री पुष्कर सिंह धामी यांनी या घटनेवर शोक व्यक्त केला असून मृतांच्या कुटुंबीयांना प्रत्येकी 2 लाख रुपये, तर जखमींना 50 हजार रुपयांची मदत जाहीर केली आहे.

पंतप्रधान नरेंद्र मोदी यांनी या दुर्घटनेवर दु:ख व्यक्त केले आहे. हरिद्वारमधील मनसा देवी मंदिर मार्गावर झालेल्या भगदडीत झालेल्या जीवितहानीमुळे अत्यंत दुःख झालं आहे. मृतांच्या कुटुंबीयांप्रती संवेदना व्यक्त करतो. जखमींच्या लवकर बरे होण्यासाठी प्रार्थना करतो, असे मोदींनी आपल्या संदेशात म्हटले आहे.

घटनेबाबत माहिती मिळवण्यासाठी उत्तराखंड सरकारने खालील हेल्पलाइन क्रमांक जारी केले आहेत:

घटनास्थळी उपस्थित एका महिला भाविकाने सांगितले, मी मंदिराच्या पायऱ्यांवर होते. अचानक गर्दी वाढली. कोणी तरी ओरडले की करंट लागला आहे आणि लोक धावायला लागले. मी खाली पडले आणि माझा हात तुटला.

गढ़वाल मंडलाचे आयुक्त विनय शंकर पांडे यांनी सांगितले की, घटनेची गंभीरतेने दखल घेण्यात आली आहे. मी स्वतः घटनास्थळी जात आहे. संपूर्ण अहवाल मिळेपर्यंत परिस्थितीवर सतत लक्ष ठेवले जाईल.