अमेरिकन बटाटामुळे शेतकरी होतायेत मालामाल, काय आहे या शेतीचा फॉर्म्युला?

मध्यप्रदेशच्या सागर येथील कृषीतज्ज्ञ आकाश चौरसिया यांनी याबाबत माहिती दिली. त्यांनी सागरमध्ये काळ्या बटाट्याची लागवड केली आहे. लोकल18 शी बोलताना त्यांनी सांगितले की, याची शेती दक्षिण अमेरिकेत केली जाते. तीन महिन्यात याचे पीक येते. हा बटाटा वर काळ्या रंगाचा तर आतमध्ये गडद जांभळा असतो. या बटाट्याची चव अगदी सामान्य बटाट्यासारखी असते. मात्र, हृदयरोग, शुगर आणि लोहाची कमतरता असलेल्यांसाठी हा बटाटा रामबाण उपाय आहे.

काळ्या बटाट्याची लागवड चिकणमाती वालुकामय जमिनीत केल्यास चांगला फायदा होतो. 100 किलो चुन्याची पावडर आणि 50 किलो कडुलिंब पावडर किंवा 200 किलो कडुलिंबाची पाने जमिनीत मिसळून आधी शिंपडा आणि शेत नांगरून टाका.

एका एकरसाठी 8 ते 10 क्विंटल बियाणे लागते. 15 ऑक्टोबर ते 15 नोव्हेंबर योग्य लागवडीची वेळ आहे. हिवाळ्याचा कालावधी यासाठी योग्य आहे. बाजारात याला 40 ते 50 रुपये किलो दर सहज मिळतो, असेही त्यांनी सांगितले.

खुल्या शेतात म्हणजेच मोनो क्रॉपिंग पद्धतीने एकाच रांगेत 8 ते 9 इंच अंतरावर एक फूट रुंद आणि अर्धा फूटाची नाली बनवून या पिकाची पेरणी करावी. बटाटा प्लँटरच्या साहाय्याने उघड्यावरही याची पेरणी करता येते. तसेच बहुस्तरीय शेतीमध्ये चार फूट रुंद वाफ्यावर तीन रांगेत 8 ते 9 इंच अंतरावर आणि 2.5 ते 3 इंच खोलीवर पेरणी करावी.

चांगल्या उत्पादनासाठी संतुलित सेंद्रिय खत म्हणून 15 टन शेणखत, 600 किलो बायोपोटाश आणि 3 टन वर्मा फॉस किंवा फॉस्फो कंपोस्ट प्रति एकर मिसळून पेरणी करावी. पेरणीच्या 21 दिवसांपासून 10 ते 15 दिवसांच्या अंतराने मटका खताचे द्रावण 15 दिवसांच्या अंतराने पाण्यात मिसळावे, अशी माहिती त्यांनी दिली.