Apurva Nemlekar : कटकारस्थानी सावनी आता पोलिसाच्या भूमिकेत, अपूर्वा नेमळेकरची नव्या मालिकेत एन्ट्री

प्रेक्षकांची लाडकी शेवंता म्हणजेच अभिनेत्री अपूर्वा नेमळेकर पुन्हा प्रेक्षकांच्या भेटीला येतेय. तिची प्रेमाची गोष्ट ही मालिका नुकतीच संपली. त्यानंतर अपूर्वा पुन्हा एकदा एका नव्या मालिकेत दिसणार आहे. 

स्टार प्रवाहच्या शुभविवाह मालिकेत लवकरच धमाकेदार ट्विस्ट पाहायला मिळणार आहे. मालिकेत सात वर्षांचा लीप येणार आहे. 

या लीपनंतर मालिकेत अपूर्वा नेमळेकर प्रेक्षकांच्या भेटीला येणार आहे.  एसीपी अपूर्वा पुरोहितच्या भूमिकेत ती दिसणार आहे. अपूर्वा यानिमित्तानं पहिल्यांदा ती पोलीस अधिकारी साकारणार आहे.

या भूमिकेविषयी सांगताना अपूर्वा म्हणाली, "स्टार प्रवाहसोबत जिव्हाळ्याचं नातं आहे. प्रेमाची गोष्ट मालिकेत मी साकारलेल्या सावनी या व्यक्तिरेखेला प्रेक्षकांचं भरभरुन प्रेम मिळालं. काही दिवसांपूर्वीच मी एका मुलाखतीमध्ये मला पोलीस अधिकारी साकारायला आवडेल असं म्हण्टलं होतं. माझी इच्छा या भूमिकेच्या निमित्ताने पूर्ण होणार आहे."

"शुभविवाह मालिकेत मी एसीपी अपूर्वा पुरोहित हे पात्र साकारणार आहे. पहिल्यांदा अश्या धडाकेबाज रुपात दिसणार आहे. नवं पात्र साकारताना नेहमी उत्सुकता असते."

"शुभविवाह मालिकेतली भूमी म्हणजेच मधुरा देशपांडेसोबत 13 वर्षांनंतर पुन्हा काम करणार आहे. आराधना मालिकेत आम्ही एकत्र काम केलं होतं. मधुरा माझी खूप चांगली मैत्रीण आहे. त्यामुळे काम करताना धमाल येणार आहे अशी भावना अपूर्वाने व्यक्त केली."

अपूर्वा पुरोहितच्या येण्यामागे नेमकं काय रहस्य आहे? तिच्या येण्याने भूमी-आकाशच्या आयुष्यावर काय परिणाम होणार? हे पहाणं उत्सुकतेचं असेल.