'मी हा रिप्लेसमेंट गेम थांबवतेय', शुभांगी अत्रेचा 'भाभीजी घर पर हैं'ला रामराम, शिल्पा शिंदेच्या कमबॅकवर स्पष्टच बोलली...

मुंबई: टीव्हीवरील सर्वाधिक लोकप्रिय विनोदी मालिकांपैकी एक असलेल्या 'भाभीजी घर पर हैं' च्या चाहत्यांना मोठा धक्का बसला आहे. गेल्या १० वर्षांपासून 'अंगूरी भाभी'ची भूमिका साकारणाऱ्या अभिनेत्री शुभांगी अत्रेने अखेर या शोचा निरोप घेतला आहे.

शुभांगीच्या बाहेर पडण्याचे कारण म्हणजे मेकर्सनी शिल्पा शिंदे, म्हणजेच मूळ अंगूरी भाभीला पुन्हा शोमध्ये आणण्याचा घेतलेला निर्णय.

शुभांगी अत्रेने शो सोडल्याच्या चर्चांना दुजोरा दिला असून, गेल्या आठवड्यात तिने आपला शेवटचा एपिसोड शूट केला आहे. 'टाईम्स ऑफ इंडिया'ला दिलेल्या मुलाखतीत शुभांगीने आपले मन मोकळे केले.

शुभांगी म्हणाली, "मी नेहमी निर्मात्या मिसेस कोहली यांना सांगितले होते की, माझा प्रवास जसा आन, बान आणि शान सोबत सुरू झाला, तसाच तो संपेल. यापेक्षा चांगली एक्झिट मी कल्पना करू शकत नाही."

तिला का रिप्लेस केले जात आहे, या कारणांमध्ये तिला जायचे नाही. ती म्हणाली, "मी याला आशीर्वाद मानते, कारण मी एक आर्टिस्ट आहे. मला आता नवीन भूमिका एक्सप्लोर करायच्या आहेत."

शुभांगी अत्रे 'भाभीजी घर पर हैं' मधून बाहेर पडल्यामुळे ती खूप भावूक झाली आहे. तिच्यासाठी हा रोल सोडणे म्हणजे आपले घर सोडण्यासारखे आहे. विशेष म्हणजे, 'चिड़ियाघर' या शोमध्येही शुभांगीने शिल्पा शिंदेला रिप्लेस केले होते.

या रिप्लेसमेंट गेमवर बोलताना शुभांगीने एक अत्यंत गोड विधान केले. ती म्हणाली, "मी हा रिप्लेसमेंट गेम आता संपवत आहे." तिने आपल्या आईला सांगितलेला किस्सा शेअर करत म्हटले, "शिल्पाने भाभीजी घर पर हैं हा शो ९-१० महिन्यांत सोडला होता. मला असे वाटले की तिने न्यूबॉर्न बेबी माझ्या स्वाधीन केला. आता ते बाळ मोठे होऊन १० वर्षांचे झाले आहे. मी आता त्याला परत करत आहे."

शुभांगी पुढे म्हणाली, "मी त्याला सर्व संस्कार दिले आहेत. मी हे मनाने परत करत आहे. मी शिल्पा शिंदे आणि संपूर्ण टीमला या शोच्या २.० व्हर्जनसाठी ऑल द बेस्ट म्हणते." सध्या शुभांगी आपले काम आणि मुलीवर लक्ष केंद्रित करत असून, ती नव्या संधींच्या शोधात आहे.