Kranti Redkar : 'बेबी नंबर 1 , बेबी नंबर 2...' पहिल्या सोनोग्राफीवेळी हलली होती क्रांती रेडकरच्या पायाखालची जमीन

प्रसिद्ध मराठी अभिनेत्री क्रांती रेडकर सध्या मोठ्या पडद्यापासून दूर आहे. पण सोशल मीडियावर ती प्रचंड सक्रीय असते. क्रांतीनं तिच्या अभिनय कारकीर्दीत अनेक यशस्वी सिनेमात काम केलं आहे. आजही तिचे सिनेमे प्रेक्षक आवडीनं पाहतात. मालिका, नाटक आणि सिनेमा या तिन्ही माध्यमांमध्ये क्रांतीनं आपल्या अभिनयाची छाप उमटवली. 

एका यशस्वी करिअरनंतर क्रांती संसारात रमली. क्रांतीनं IRS अधिकारी समीर वानखेडेंशी लग्न केलं. क्रांती आता दोन जुळ्या मुलांची आई आहे. काही दिवसांआधीच तिने तिच्या जुळ्या मुलींची चेहरे पहिल्यांदा चाहत्यांना दाखवले.

जुळ्या मुलींची आई होणं क्रांतीसाठीही सोपं नव्हतं. तिला जेव्हा पहिल्यांदा कळलं की तिला जुळे मुलं होणार आहे तेव्हा काय घडलं हे तिने नुकत्याच एका मुलाखतीत सांगितलं.  

लोकशाहीला दिलेल्या मुलाखतीत बोलताना क्रांतीने तिच्या पहिल्या सोनोग्राफीचा किस्सा सांगितला. ती म्हणाली, "मी पहिल्या सोनोग्राफीला गेले तेव्हा मला एवढंच माहिती होतं की मी प्रेग्नंट आहे. डॉक्टर पोटावर यंत्र फिरवत होत्या आणि टीव्हीमध्ये बघत होत्या. मी त्यांच्याकडे बघत होते. त्यांनी मला सांगितलं, हे बघ सगळं काही ठीक दिसत आहे. तुला दिसतंय, बेबी नंबर 1 इथे आहे आणि बेबी नंबर 2 इथे आहे. दोन्ही ठीक आहेत."

"त्यांना असं वाटलं की मला माहिती आहे. पण माझं असं झालं की बेबी नंबर 1 -2 काय आहे. मी त्यांना विचारलं डॉक्टर ट्विन्स आहेत? त्या म्हणाल्या, हो ट्विन्स आहेत. पिक्चरमध्ये घडतं तसं काहीच घडलं नाही."

क्रांती पुढे म्हणाली, "माझ्या पायाखालची जमीन हलली होती. मी एका गोष्टीसाठी खुश होते की, माझ्या आयुष्यात मुलं ही माझ्या वयाच्या टप्प्यावर खूप उशिरा आली. माझं सगळं करिअर झाल्यावर आता लग्न करूया, मुलं करूया. ट्विन्स होणार कळल्यावर माझं असं झालं की, चला आता एका फटक्यात काम झालं. पुन्हा प्रेग्नंट राहायला नको, त्यामुळे मी खूप खुश होते."

"मी समीर व्हिडीओ कॉल केला. मला धीरच नव्हता. त्यांनी मला विचारलं, कशी झाली सोनोग्राफी, काय म्हणाले डॉक्टर. मी म्हटलं, मस्त झाली. मी त्याला दोन बोटांनी सगळं काही ठीक आहे असं सांगितलं. दोन बेबी आहेत आणि ते खूप खुश झाले. त्या दिवशी ते ऑफिसमधून लवकर आले, आम्ही सेलीब्रेशन केलं."