बॅडमिंटन खेळताना आली आठवली, रॅकेट फेकलं अन् थेट कविताचं घर गाठलं; 'रेहमान'च्या वडिलांची रोमँटिक Love Story

आपण बोलतोय तो अभिनेता म्हणजे विनोद खन्ना. पाकिस्तानातील पेशावर येथे जन्मलेल्या विनोद खन्ना यांना सुनील दत्त यांनी चित्रपटांमध्ये काम करण्याची संधी दिली होती. ते एका अतिशय सामान्य कुटुंबातून आले होते. विनोद खन्ना यांनी सुरुवातीला खलनायकाच्या भूमिका केल्या. 'मेरे अपने' या चित्रपटातून त्यांची लोकप्रियता मिळाली आणि अभिनेता होण्याची संधी मिळाली. 

अभिनेते विनोद खन्ना यांचं वैयक्तिक आयुष्य कायमच चर्चेत राहिलं. त्यांचं ओशो आश्रमात जाणं ते दोन लग्न करण्यापर्यंत अनेक गोष्टींची चर्चा झाली. 

विनोद खन्ना यांची पहिली पत्नी म्हणजेच गीतांजली. कॉलेजमध्ये असताना दोघांची लव्ह स्टोरी सुरू झाली होती. दोघांना अक्षय आणि राहुल खन्ना ही दोन मुलं झाली.  एक काळ असा होता जेव्हा विनोद खन्ना यांनी एकाच दिवसात 15 चित्रपट साइन केले.

परंतु ओशोंच्या प्रभावामुळे त्यांचे करिअर आणि कौटुंबिक जीवन उद्ध्वस्त झाले. 1975 मध्ये विनोद यांनी त्यांच्या आईच्या निधनानंतर चित्रपटसृष्टीतून निवृत्ती घेतली. ते ओशोंसोबत पुण्यातील एका आश्रमात राहिले. त्यानंतर ते अमेरिकेत गेले. 

विनोद खन्ना भारतात परतले तेव्हा त्यांचे कुटुंब उद्ध्वस्त झाले. त्यांची पत्नी गीतांजली यांनी त्यांना घटस्फोट दिला. विनोद खन्ना यांनी स्वत:ला सावरलं आणि 1987 मध्ये त्यांनी इंसाफ सिनेमातून कमबॅक केलं. एक संसार मोडल्यानंतर ते एकटे पडले होते. तेव्हाच त्यांच्या आयुष्यात कविता दफ्तरी यांची एन्ट्री झाली. 1988 साली कविता आणि विनोद खन्ना यांची एका पार्टीमध्ये भेट झाली. 

कविता विनोद खन्नांपेक्षा 16 वर्षांनी लहान होत्या. विनोद खन्ना पहिल्याच भेटीत तिच्या प्रेमात पडले. मित्रांच्या मदतीने त्यांनी तिचा फोन नंबर मिळवला. दोघे फोनवर बोलू लागले. एके दिवशी विनोद खन्ना बॅडमिंटन खेळत होते. त्यांना अचानक कविताची आठवण आली आणि घामानं चिंब झालेले विनोद खन्ना धावत धावत थेट तिच्या घरी पोहोचले. त्यांनी कविताला प्रपोज केलं आणि लग्नाची मागणी घातली. कवितानं देखील लगेचच त्यांना होकार दिला. 

विनोद खन्ना यांनी 70 चा काळ गाजवला पण 1980-1981 साली यांची स्पर्धा अमिताभ बच्चनसोबत सुरू झाली.  विनोद खन्ना यांनी ओशोच्या मार्गावर जाण्याचा निर्णय घेतला आणि त्याचं करिअर फ्लॉप झालं. अमिताभ बच्चन यांच्या करिअरला नवी दिशा मिळाली.